ރާއްޖޭގެ ފުޓްބޯޅައިގެ މައި އިދާރާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އެކްސްކޯގެ ދެ މެންބަރަކު އިސްތިއުފާ ދީފި އެވެ.
އިސްތިއުފާ ދިނީ މާޒިޔާ ސްޕޯޓްސްގެ ފަރާތުން އެކްސްކޯގައި ހިމެނޭ ހުސައިން ޝާފިއު (ކޮކީ) އާއި ގްރީން ސްޓްރީޓްސްގެ ފަރާތުން އެކްސްކޯގައި ހިމެނޭ މުއާވިއަތު ހަލީލެވެ. އެ ދެ މީހުންގެ ތެރެއިން ކޮކީ އިސްތިއުފާ ދިނީ މިދިޔަ ބުދަ ދުވަހު އެވެ. އަދި މުއާވިޔަތު އިސްތިއުފާ ދިނީ މިދިޔަ މަހު އެވެ.
އެ ދެ މީހުންގެ އިސްތިއުފާއާ އެކީ އެކްސްކޯގައި މިހާރު ތިބީ 7 މެންބަރެކެވެ.
1. ބައްސާމް އަދީލް ޖަލީލް (ރައީސް)
2. އަލީ އުމަރު (ނައިބް ރައީސް)
3. މުހައްމަދު ޝިފާއު (ދަ ގްރާންޑޭ)
4. އަހުމަދު ނަޝީދު (ޓީސީ)
5. މުފާވިޒް ހާޝިމް (އީގަލްސް)
6. އާމިނަތު ޝާނީޒް (އެފްއޭއެމް މުވައްޒަފެއް)
7. އަހްމަދު ޝަކީބު (އެފްއޭއެމްގެ މުވައްޒަފެއް)
އެފްއޭއެމްގެ މިހާރުގެ އެކްސްކޯ އިންތިހާބުކުރީ 2020 ގަ އެވެ. އަދި އޭގެ ދައުރު ހަމަވާނީ އަންނަ އަހަރު އެވެ.
އެކްސްކޯގެ ދެ މެންބަރަކު އިސްތިއުފާ ދިން ނަމަވެސް އަސާސީ ގަވައިދުގައިވާ ގޮތުން އެކްސްކޯގެ އާ އިންތިހާބެއް ބޭއްވޭނީ ދައުރު ހަމަވުމުން ނުވަތަ އެކްސްކޯގެ ދެބައިކުޅަ އެއްބައި މެންބަރުން އިސްތިއުފާ ދިނުމުންނެވެ.
އެފްއޭއެމަކީ މި ފަހުން ވަރަށް ގިނަ ބައެއްގެ ފާޑުކިޔުުންތައް އަމާޒުވެފައިވާ ތަނެކެވެ. އަދި އެތަން ހިންގުން ބޮއްސުންލާފައިވާ ކަމަށާއި އޭގެ ސަބަބުން ރާއްޖޭގެ ފުޓްބޯޅަ ހަލާކުވެފައިވާ ކަމަށް ވަރަށް ގިނަ ބަޔަކު ބުނެ އެވެ.