ރައީސްކަމުގެ ހުވާ ކުރެއްވުމަށް ފަހު ގައުމުން ބޭރަށް ކުރައްވާ ފުރަތަމަ ދަތުރުގައި އިންތިހާބީ ރައީސް ޑރ. މުހައްމަދު މުއިއްޒު އެންމެ ފުރަތަމަ ވަޑައިގަންނަވާ ގައުމަކަށް ވާނީ ސައުދީ އަރަބިއްޔާކަން އެނގިއްޖެ އެވެ.
އިތުބާރު ހުރި ބައެއް ފަރާތްތަކުން މިކަން ހިއްސާކުރި ނަމަވެސް މުއިއްޒުގެ ފަރާތުން މިކަން އަދި ކަށަވަރުކޮށް ދީފައެއް ނުވެ އެވެ. މުއިއްޒު އިންތިހާބުވެވަޑައިގަތުމާ ގުޅިގެން އެންމެ ފުރަތަމަ މަރުހަބާ ކި ގައުމުތަކުގެ ތެރޭގައި ސައުދީ ހިމެނެ އެވެ. އަދި ރާއްޖޭގައި ހުންނަވާ ސައުދީ ސަފީރާއި މުއިއްޒާ ބައްދަލު ކުރައްވައި ދެ ގައުމުގެ ގުޅުން ހަރުދަނާކޮށް، ބަދަހިކުރެއްވުމާ ގުޅޭ ގޮތުން މަޝްވަރާ ކުރައްވާފައިވެ އެވެ.
އެ ބައްދަލުވުމުގައި ރާއްޖޭގެ ތަރައްގީ އާއި ކުރިއެރުމަށް ސައުދީން މިހާރެކޭ އެެއްގޮތަށް އެއްބާރުލުމާއި އެހީތެރިކަން ދޭނެކަމުގެ ޔަގީން ވެސް ދީފައިވެ އެވެ.
ސައުދީ އަކީ އަބަދު ވެސް ރާއްޖެއާ ވަރަށް ގާތް ގުޅުމެއް ބާއްވާ ގައުމެކެވެ.
ދާދި ފަހުން ބައެއް މީޑިއާތަކުން ރިޕޯޓްކުރި ގޮތުގައ މަގާމުގެ ހުވާ ކުރެއްވުމަށް ފަހު، މުއިއްޒު އެންމެ ފުރަތަމަ ވަޑައިގަންނަވާ ގައުމަކަށް ވާނީ އަވައްޓެރި އިންޑިއާ އެވެ. އެކަމަކު އެކަމާ ބެހޭ ގޮތުން ވެސް މުއިއްޒު ވަކި އެއްޗެއް ވިދާޅެއް ނުވެ އެވެ. ނަމަވެސް އެކި ގައުމުތަކުގެ ސަފީރުންނާ އެކީ ފާއިތުވި ދެ ހަފުތާގެ ތެރޭގައި ބޭއްވި ބައްދަލުވުންތަކުގައި ގައުމުތަކުން ސަފީރުންގެ ފަރާތުން އެ ގައުމުތަކަށް ވަޑައިގެންނެވުމަށް ދައުވަތު ދެއްވާފައިވާ ކަމަށް އިންތިހާބީ ރައީސްގެ އޮފީހުން ބުނެ އެވެ.
މުއިއްޒު ރައީސްކަމުގެ ހުވާކުރައްވާނީ އަންނަ މަހުގެ 17 ގަ އެވެ.