ރާއްޖޭގެ ދަނޑުވެރިކަމަށް ބޭނުން ވަނީ ކުދި ބިންތަކުގައި އުފައްދާ މަތީ އަގު ލިބޭ އުފެއްދުންތައް ކަމަށް ދަނޑުވެރިކަމާ ބެހޭ މިނިސްޓަރު ޑރ. ހުސެއިން ރަޝީދު ހަސަން ވިދާޅުވެއްޖެ އެވެ.
މިއަދު ފާހަގަ ކުރާ ޤައުމީ ދަނޑުވެރިކަމުގެ ދުވަހާއި ގުޅިގެން މިނިސްޓަރު ހުސެއިން ކުރެއްވި ޓްވީޓެއްގައި ވިދާޅުވީ، ރާއްޖެއަކީ ދަނޑުވެރިކަމަށް އޮތް ބިން ކުޑަ، ފަތުރުވެރިކަމަށް ނުހަނު ބޮޑަށް ބަރޯސާ ވެފައިވާ ޤައުމެއް ކަމަށެވެ. އަދި މިއަދު މި ސިނާޢަތް ފުޅާކުރުމަށް ބޭނުންވަނީ ދަނޑުވެރިކަމަށް އުފައްދާ ތަކެއްޗަކީ ދިވެހިންގެ ކާބޯތަކެތީގެ ރައްކާތެރިކަމަށާއި، ފަތުރުވެރިކަމުގެ މާކެޓަށް އާމަޒުކޮށްގެން އުފައްދާ އުފެއްދުން ތަކަށް ހެދުން ކަމަށެވެ.
"ރާއްޖޭގެ ދަނޑުވެރިކަން އަދި ދަނޑުވެރިކަމުގެ ވިޔާފާރި އިތުރަށް ފުޅާކޮށް ތަރައްގީ ކުރުމަށްޓަކާ މިއަދު އެންމެ ބޭނުންވަނީ، އުފައްދާ ތަކެއްޗަކީ ދިވެހިންގެ ކާބޯތަކެތީގެ ރައްކާތެރިކަމަށާއި ފަތުރުވެރިކަމުގެ މާކެޓަށް އަމާޒުކޮށް، ޒަމާނީ ޓެކްނޮލޮޖީގެ އެހީގައި، ކުދިބިންތަކުގައި އުފައްދާ މަތީއަގުލިބޭ އުފެއްދުންތަކަށްހެދުން." ދަނޑުވެރިކަމާއި ބެހޭ ވަޒީރު ވިދާޅުވިއެވެ.
ދަނޑުވެރިކަމުގެ އުފެއްދުންތަކަށް ހަމަ އަގު ހޯދުމުގެ މަސައްކަތް ސަރުކާރުން ފަށައި، އެގްރޯނެޓް ކިޔާ ކުންފުންޏެއް ވަނީ އުފައްދާފައެވެ. މި ކުންފުނީގެ އެހީއާއެކު ރާއްޖޭގެ އެކި ސަރަހައްދުތަކުގައި ކޮންޓްރެކްޓް ފާމިން މަސައްކަތް މިހާރުވެސް ސަރުކާރުން ކުރިއަށް އެބަ ގެންދެއެވެ. މީގެ އިތުރުން މި ތަކެތި ރައްކާތެރި ކަމާއި އެކު މާކެޓުތަކަށް ގެންދިއުމަށް އެގްރި ބޯޓުވެސް ތަޢާރަފް ކުރުމަށް މަސައްކަތް ކުރެވިގެން ދިޔައެވެ.
ޤައުމީ ފެންވަރުގައި ދަނޑުވެރިކަމުގެ ދުވަހެއް ފާހަގަ ކުރަން ނިންމީ، 2020 ވަނަ އަހަރުއެވެ. އޭގެ ފަހުން ކޮންމެ އަހަރަކުވެސް އެ ދުވަސް ފާހަގަ ކުރެއެވެ.