ރައީސް އިބްރާހިމް މުހައްމަދު ސާލިޙް މިދިޔަ އަހަރު ސައުދި އަރަބީއްޔާއަށް ކުރެއްވި ދަތުރުފުޅަށް ފަހު، 2.3 ބިލިއަން ރުފިޔާގެ އެހީއެއް ސައުދީ ފަންޑުން ދޭން ނިންމައިފިއެވެ.
ސައުދި އަރަބީއްޔާއިން ދޭ މި އެހީ އަކީ ވެލާނާ އެއާޕޯޓު ނިންމުމަށް ދޭ 100 މިލިއަން ޑޮލަރުގެ އެހީއަކާއި، ރާއްޖޭގެ ސިއްޙީ ދައިރާގެ ތަރައްޤީއަށްދޭ 50 މިލިއަން ޑޮލަރުގެ އެހީއެކެވެ. ސައުދީ ފަންޑުގެ މި އެހީ ދޭން ނިންމާފައިވާ ކަން ރާއްޖޭގެ ހުންނަ ސައުދީ އެމްބަސީ އަދި ފޮރިން މިނިސްޓްރީންވެސް ވަނީ މީޑިއާތަކަށް ކަށަވަރު ކޮށްދީފައެވެ. މި ފައިސާގެ އެއްބަސްވުމުގައި ދާދި އަވަހަށް ސޮއިކުރައްވާނެ ކަމަށް ވަނީ މަޢުލޫމާތު ލިބިފައެވެ.
މި ލޯނު އެހީގެ މަޝްވަރާތައް ކުރިއަށް ދިޔައީ މިދިޔަ އަހަރު ރައީސް އިބްރާހީމް މުހައްމަދު ސާލިޙް މިދިޔަ އަހަރު ޢުމްރާގެ އަޅުކަން އަދާ ކުރުމަށް ސައުދި އަރަބީއްޔާއަށް ވަޑައިގެންނެވި، ދަތުރުފުޅުގެ ތެރެއިންނެވެ. އަދި މިހާރު އެ ފައިސާ ދޫކުރާނެ ކަމުގެ ޔަޤީންކަން އެ ޤައުމުން ދީފައިވާ ކަމަށް ދިވެހި ސަރުކާރުން ވަނީ ހާމަކޮށްފައެވެ.
މި އެހީގެ ތެރެއިން 50 މިލިއަން ޑޮލަރު ނުވަތަ 767.5 މިލިއަން ރުފިޔާގެ އެހީ ބޭނުން ކުރުމަށް ހަމަޖެހިފައިވަނީ ރާއްޖޭގެ ސިއްޙީ ދައިރާ ތަރައްޤީކޮށް ހޮސްޕިޓަލް އެޅުން ފަދަ މަޝްރޫޢުތަކަށް ކަމަށް ސަރުކާރުން ވަނީ ހާމަކޮށްފައެވެ.
ވެލާނާ އެއާޕޯޓު ތަރައްޤީ ކުރުމުގެ މަސައްކަތުގެ ތެރެއިން ޓާމިނަލް މަސައްކަތް ހަވާލުކޮށްފައިވަނީ ސައުދީ ބިއްލާދިން ގްރޫޕާއިއެވެ. އެ މަސައްކަތުގެ ޢަމަލީ މަސައްކަތް 2018 ވަނަ އަހަރު ފެށިއިރު، ޑިޒައިނަށް ބަދަލު ގެނެސް 2019 ވަނަ އަހަރު ޖޫން މަހު ވަނީ އަލުން ސޮއިކޮށްފައެވެ. މި ސަރުކާރުން އުއްމީދު ކުރަނީ މި ޓާމިނަލް މަސައްކަތް 2025 ވަނަ އަހަރަށް ނިމޭނެ ކަމަށެވެ.
ޓާމިނަލް މަސައްކަތަކީ އޯޕެކް ފަންޑުން 50 މިލިއަން ޑޮލަރު، ކުވެއިތު ފަންޑުން 50 މިލިއަން ޑޮލަރު އަދި ޗައިނާގެ އެގްޒިމް ބޭންކުން 373.9 މިލިއަން ޑޮލަރު ލޯނު އެހީގައި ކުރިއަށް ދާ މަސައްކަތެކެވެ.