މޫސުމީ ބަދަލުތަކާއި ގުޅޭގޮތުން އިންތިޙާބީ ރައީސް ޑރ. މުޢިއްޒު ދެއްކެވި ވާހަކަތައް، އިންތިހާބީ ރައީސްގެ އޮފީހުން ތަރުޖަމާކޮށްދެއްވައިފިއެވެ.
އިންތިހާބީ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އިންތިހާބީ ރައީސް މޫސިމީ ބަދަލުތަކާއި ގުޅޭގޮތުން އަލްޖަޒީރާއަށް ދެއްވި ބަސްތީ ގަތުމުގައި ދެއްކެވި ވާހަކަތަކާއި ގުޅުވައި ވަނީ ސުވާލު ކޮށްފައެވެ. މިކަމާއި ގުޅޭގޮތުން އިންތިހާބީ ރައީސްގެ ތަރުޖަމާނު މުހައްމަދު ފިރުޒުލް ވަނީ ޑރ. މުޢިއްޒުގެ ވާހަކަފުޅުގެ މުރާދަކީ އެއީ ކަމަށް ނުދެކޭ ކަމަށް ވިދާޅުވެފައެވެ.
" އިންތިހާބީ ރައީސުލްޖުމުހޫރިއްޔާގެ ވާހަކަފުޅު އެ މޭރުމުން މާނަ ކުރެވެނީ، ވާހަކަފުޅު މަޙްފޫމުން ބޭރުން ކޮންމެވެސް ވަރަކަށް މާނަ ކުރެވޭތީ. އިންޓަވިއު ބައްލަވައިފިނަމަ ފާހަގަވާނެ ވަރަށް ސާފުކޮށް ފެނިވަޑައިގަންނަވާނެ، ވަރަށް ސާފުކޮށް ފާހަގަ ކުރެއްވި މޫސުމީ ބަދަލުތަކުގެ ސަބަބުން ދިމާވަމުންދާ އެކި ގޮންޖެހުންތަކުގެ ވާހަކަތައް" ފިރުޒުލް ވިދާޅުވިއެވެ.
ފިރުޒުލް ވަނީ، ޑރ. މުޢިއްޒުގެ ވާހަކައިގެ ފަހުން ފާހަގަކޮށްދެއްވި ބައެއް ކަންކަމަށް އަލިއަޅުވާލާފައެވެ. އެގޮތުން މޫސުމީ ބަދަލުތަކަށް ރާއްޖެއަށް ބޭރުގެ ފަރާތްތަކުން އެހީ ބޭނުން ބޭނުންވާ ކަމަށާއި، ކްލައިމެޓް އެޑެޕްޓޭޝަންއަށް މަސައްކަތް ކުރުމާއި، އޭގެ އިތުރުން ރާއްޖޭގެ ދިމާވާ މޫސުމީ މައްސަލަތަކަކީ ބޮޑެތި ޤައުމުތަކުގެ ސަބަބުން ދިމާވާ މައްސަލަތައް ކަމަށްވެސް ފާހަގަކޮށްދެއްވާފައިވާކަން ފިރުޒުލް ވިދާޅުވިއެވެ.
"ތިވިދާޅުވި ގޮތަށް އެވާހަކަތައް މާނަކުރުމުގެ އެއްވެސް ޖާގައެއް އޮތް ކަމަށް އަޅުގަނޑު ނުދެކެން. އިންތިހާބީ ރައީސުލްޖުމުހޫއްރީއްޔާ މޫސުމީ ބަދަލުތައް ސީރިއަސް މައްސަލައެއް ގޮތުގައި ފާހަގަ ކުރައްވާފައި އެވަނީ. އޭގެ ސަބަބުން ރާއްޖެއަށް ހުރި ގޮންޖެހުންތައްވެސް ފާހަގަ ކުރައްވާފައި އެވަނީ. " ފިރުޒުލް ވިދާޅުވިއެވެ.
އިންތިހާބީ ރައީސް ޑރ. މުހައްމަދު މުޢިއްޒު އަލްޖަޒީރާއަށް ދެއްވި ބަސްތީގަތުމުގައި، ބޭރުގެ ބައެއް ފަރާތްތަކުން ކޮށްފައިވާ ދިރާސާގައި މިހާރު ކަނޑުގެ ލޮނުގަނޑު އުފުލޭ ރޭޓުގައި އުފުލޭ ނަމަ، ޤައުމުގެ 80 އިންސައްތަ ރަށްރަށުގައި ދިރިނުއުޅެވޭނެ ކަމަށް ބުނެފައިވާ ކަމަށް ފާހަގަ ކުރިއެވެ. އަދި މިކަމަށް އެއްވެސް ޕްލޭނެއް ގެންގުޅުއްވާތޯ ވަނީ ސުވާލުކޮށްފައެވެ.
އެ ސުވާލަށް ޖަވާބު ދެއްވަމުން ޑރ. މުޢިއްޒު ވަނީ ނާސާ ފަދަ ތަންތަނުން ހާދާފައިވާ ދިރާސާ ތަކަކީ އެހާ ސައްޙަ ދިރާސާތަކެއް ކަމަށް ޤަބޫލު ނުކުރައްވާ ކަމަށް ވިދާޅުވެފައެވެ. އަދި މިއީ އަބަދުވެސް އަޑުއިވޭ ވާހަކަތަކެއް ކަމަށް ވިދާޅުވިއެވެ.
" ތެދަށް ބުނާކަމުގައި ވަނީ ނަމަ، އަޅުގަނޑަށް ޤަބޫލެއް ނުކުރެވޭ އެއީ އެހާ ސައްޙަ ވާހަކައެއް ކަމަށް. މިއީ މީގެ 50 އަހަރު ކުރިންވެސް ދެއްކި ވާހަކަތައް. އަޅުގަނޑުމެންނަކަށް ނުފެނޭ ކަނޑުގެ ލޮނުގަނޑު އެވަރަށް އުފުލޭ ތަނެއް " ޑރ. މުޢިއްޒު ވިދާޅުވިއެވެ. " އަޅުގަނޑަށް ހީވަނީ މީހުން އައިސް ބަލަން ފެށީމަ ފެންނާނެހެން، އެއީ ދޮގުތަކެއް ކަން. ރާއްޖޭގެ ހާތަލު އެހާ ސީރިއަސް ނޫންކަން"
މުޢިއްޒުގެ މިވާހަކަތަކާއި ގުޅިގެން ސޯޝަލް މީޑިއާގައި ވަރަށް ބޮޑަށް ފާޑުކިއުން ވަނީ އަމާޒުވެފައެވެ.