އަންނަ ޑިސެމްބަރުގެ ނިޔަލަށް ބޭނުންވާ ސިއްހީ ސާމާނު ހުރިހާ ހޮސްޕިޓަލެއްގައި ވެސް އެބަހުރި ކަމަށް ހެލްތު މިނިސްޓްރީން ބުނެފި އެވެ.
އެ މިނިސްޓްރީން މިގޮތަށް ނިންމީ ސަރުކާރުގެ އެންމެ ބޮޑު ހޮސްޕިޓަލް ކަމަށްވާ އައިޖީއެމްއެޗަށް ކަނޑައަޅާފައިވާ ބަޖެޓުގެ ތެރެއިން މި އަހަރުގެ ބާކީ މިއޮތް މުއްދަތަށް ފައިސާ ހަމަޖެހިފައި ވަނީ ހަމައެކަނި މުވައްޒަފުންގެ މުސާރައަށް ބޭނުންވާ މިންވަރަށް ކަމަށާއި މީގެ ސަބަބުން އަންނަ މަހުގެ ތެރޭގައި ސިއްީ ހިދުމަތް ހުއްޓުމުގެ ބިރު އޮތް ކަމަށް އެކަނިކަމަށް އިންތިހާބީ ރައީސް ޑރ. މުހައްމަދު މުއިއްޒުގެ އިންތިގާލީ އޮފީހުގެ ތަރުޖަމާނު މުހައްމަދު ފިރުޒުލް އަބްދުﷲ ޚަލީލު އިއްޔެ ވިދާޅުވުމާ ގުޅިގެންނެވެ.
އެ ވާހަތަކާ ގުޅިގެން ހެލްތު މިނިސްޓްރީން ބުނީ ޑިސެމްބަރު މަހުގެ ނިޔަލަށް ހޮސްޕިޓަލްތައް ހިންގަން ބޭނުންވާ ވަރަށް ތަކެތި އެބަހުރި ކަމަށާއި އޭގެ ފަހަށް ބޭނުންވާ ތަކެތި ގަތުމަށް ބޭނުންވާ ފައިސާ ވެސް ހަމަޖެހޭނެ ކަމަށެވެ. އަދި ހޮސްޕިޓަލްތައް ނުހުއްޓި ހިނގާނެކަމުގެ ޔަގީންކަން އެބައޮތް ކަމަށާއި މިހާރު އެޕްރޫވް ނުވެހުރި ފައިސާ ވެސް ހަމަޖެހޭނެ ކަމަށް ހެލްތު މިނިސްޓްރީން ބުންޏއެވެ.
ފިރުޒުލް ވިދާޅުވެފައިވާ ގޮތުގައި ސިއްހީ ދާއިރާގެ ބަޖެޓު ހަމަޖެހިފައި ނެތުމުން ބައެއް ހޮސްޕިޓަލްތަކުގެ އިމާރާތާއި މެޝިނަރީޒްގެ މަރާމާތު ވެސް ހުއްޓުމަކަށް އައިސްފައިވެ އެވެ. އެގޮތުން ހޮސްޕިޓަލްތަކަށް ބޭނުންވާ ތަކެތި އާންމުކޮށް ގަންނަނީ ގަނޑުކޮށް އަހަރަކު ދެ ފަހަރު ކަމަށާއި، މި އަހަރުގެ ފަހު ހަ މަހަށް ބޭނުންވާ ސާމާނު ގަތުމަށް އަދިވެސް އޯޑަރު ކޮށްފައި ނުވާ ކަމަށާއި ބައެއް ހޮސްޕިޓަލްތަކުގައި މިހާރު ބޭނު ންކުރަނީ ކުއްލި ހާލަތްތަކުގައި ބޭނުންކުރަން ހުރި ތަކެތި ކަމަށް ވެސް ވިދާޅުވެފައިވެ އެވެ.