އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި ވެސް ކާށިދޫ ދާއިރާގެ ގޮނޑި އަށް ވާދަކުރައްވާނެ ކަމަށް އެ ދާއިރާގެ މިހާރުގެ ވެސް މެމްބަރު އަބްދުﷲ ޖާބިރު ވިދާޅުވެއްޖެ އެވެ.
ސަންގު ޓީވީގައި އެކަން ކަށަވަރުކޮށް ދެއްވަމުން އޭނަ ވިދާޅުވީ އެ ދާއިރާ އަށް ވާދަކުރައްވާނީ އެމްޑީޕީގެ ޓިކެޓްގައި ކަމަށާއި އެ ކާށިދޫ ޕްރައިމަރީގައި އޭނައާ ވާދަކޮށްލެވޭ ވަރުގެ އެހެން މީހަކު އެމްޑީޕީގައި ނެތް ކަމަށެވެ.
އެމްޑީޕީން ބުނެފައިވާ ގޮތުގައި އެ ޕާޓީގެ ވިސްނުން ހުރީ މަޖިލިސް ޕްރައިމަރީ އަންނަ ޑިސެމްބަރު މަހުގެ ތެރޭގައި ބޭއްވުމަށެވެ.
އަންނަ އަހަރުގެ މަޖިލިސް އިންތިހާބު ބާއްވާނީ މާޗްގެ ފަހުކޮޅު ނުވަތަ އެޕްރީލްގެ ކުރީކޮޅު ކަމަށް އިލެކްޝަން ކޮމިޝަން (އީސީ) އިން ބުނެފައިވެ އެވެ. މި އިންތިހާބުގައި ޖުމްލަ 93 މެމްބަރަކު އިންތިހާބު ކުރާނެ އެވެ.
މިހާރު ހިނގަމުން އަންނަ 19 ވަނަ މަޖިލީހުގައި ތިއްބަވަނީ 87 މެމްބަރުންނެވެ.