ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލައިގައި ޖަވާބުދާރީވުމަށް ރައީސް މުހައްމަދު ނަޝީދަށް 30 މިނެޓްގެ ވަގުތު ދިނުމަށް މަޖިލީހުގެ އާންމު ކޮމިޓީން ފާސްކޮށްފިއެވެ.
ރައީސް ނަޝީދުގެ އިތުބާރު ނެތްކަމުގެ މައްސަލަ ދެވަނަ ފަހަރަށް ރައްޔިތުންގެ މަޖިލީހަށް ހުށަހަޅާފައިވަނީ އެމްޑީޕީގެ 48 މެންބަރުންގެ ސޮޔާއެކުއެވެ.
އިތުބާރު ނެތްކަމުގެ މައްސަލަ ކުރިއަށް ގެންދިއުމުގައި އާންމު ކޮމިޓީން މިއަދު ނިންމާފައިވަނީ މައްސަލައިގެ ޖުމުލަ ބަހުސަށް ދެ ގަޑިއިރު ދިނުމަށެވެ. އަދި ޖަވާބުދާރީ ވުމަށް ބަހުސްގެ ފެށުމުން، މެދުތެރެއިން އަދި ނިމުމުން ރައީސް ނަޝީދަށް 10 މިނެޓްގެ ތިން ފުރުސަތު ދިނުމަށް ވަނީ ނިންމާފައެވެ.
ރައީސް ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް ނިންމާ، އެ މައްސަލައިގެ ނޯޓިސްވެސް ވަނީ އެމަނިކުފާނަށް ފޮނުވާފައެވެ.