ދެކުނުގެ ރަަށެއްގައި އުމުރުން 18 އަހަރު ނުވާ ކުއްޖަކާއި ބެހިގެން، އެކުއްޖާ ބަނޑުބޮޑުވި މައްސަލާގައި މީހަކު ހައްޔަރު ކޮށްފައިވާ ކަމަށް ފުލުހުން ހާމަކޮށްފިއެވެ.
ފުލުހުން ބުނީ މި މައްސަލާގައި ހައްޔަރުކޮށްފައިވަނީ އުމުރުން 26 އަހަރުގެ ފިރިހެނެއް ކަމަށެވެ. އަދި އެމީހާ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން 30 ދުވަސް ޖަހާފައިވާ ކަަމަށް ފުލުހުން ބުނެއެވެ.
މިމައްސަލަ ފެންމެތިވީ އުމުރުން 15 އަހަރުގެ ކުއްޖާގެ މަންމަ ސޯޝަލް މީޑިއާގައި ކުރި ޕޯސްޓަކާއި ގުޅިގެންނެވެ. އެގޮތުން އޭނާގެ ދަރިފުޅު އެރަށަށް ނިސްބަތްވާ ފިރިހެނުންތަކެއް ރޭޕްކޮށް ބަނޑުބޮޑު ކޮށްލާފައިވާ ކަމަށް މަންމަ ވަނީ ތުހުމަތުކޮށްފައެވެ. އަދި ދަރިފުޅުގެ ބަނޑުގައި އޮތް ކުއްޖާ ބޭސް ދީގެން ވައްޓާލަން މަސައްކަތްކޮށް އެކަން ކާމިޔާބު ނުވުމުން އެވާހަކަ އޭނާ އާއި ހިއްސާކުރި ކަމަށް މަންމަ ބުނިއެވެ.
މިމައްސަލަ ފެންމަތިވެ މައްސަލަ ފުލުހުން ބަލަން ފެށީ މިމަހުގެ 8 ވަނަ ދުވަހުއެވެ. މިމައްސަލާގައި ޖެންޑާއިން ވަނީ ކުއްޖާއަށް ރައްކާތެރި މާހައުލެއް ކަށަވަރުކޮށް ދިނުމުގެ މަސައްކަތް ކުރަމުންދާ ކަމަށް ބުނެފައެވެ.