މިއަހަރުގެ ވޯލްޑް ޓްރެވެލް އެވޯޑްސް އިންޑިއާ ކަނޑުގެ ސަރަހައްދުގެ ލީޑިން އެއަރޕޯޓް ހޮޓެލަކަށް އީކުއެޓަރ ވިލެޖު ހޮވިއްޖެއެވެ.
ވޯލްޑް ޓްރެވެލް އެވޯޑްސްގެ އިންޑިއާ ކަނޑުގެ ސަރަހައްދަށް އަދި އެފްރިކާ ސަރަހައްދަށް ހާއްސަކޮށް ދުބާއީގައި މިމަހުގެ 15 ވަނަ ދުވަހު ވަނީ އެވޯޑް ހަފްލާ ބާއްވާފައެވެ. މި ހަފްލާގައި އިންޑިއާ ކަނޑު ސަރަހައްދުގެ ލީޑިންގް އެއާޕޯޓް ހޮޓެލް ކެޓަގަރީ އީކުއޭޓަރ ވިލެޖް ކާމިޔާބު ކުރީ، އިތުރު 4 ހޮޓަލަކާއި ވާދަކޮށެވެ. މީގެ ތެރޭގައި ރާއްޖޭގެ ހުޅުލޭ އައިލޭންޑް ހޮޓެލް ހިމެނެއެވެ. ދެން މި ކެޓަގަރީގައި ވާދަ ކުރީ މޮރިޝަސްގެ ދެ ހޮޓަލާއި ސީޝެލްސްގެ ހޮޓަލެކެވެ.
މި އެވޯޑު ލިބުމާއި ގުޅިގެން އީކުއޭޓަރ ވިލެޖުން ކުރި ޕޯސްޓެއްގައި މި އެވޯޑު ހާސިލް ކުރުމަށް އެހީވެ ދިން ހުރިހާ ފަރާތްތަކަށް ވަނީ ޝުކުރު އަދާކޮށްފައެވެ. އަދި މިއީ އެއާޕޯޓުން ފެށިގެން ގެސްޓުން ބޭނުންވާ މަންޒިލާއި ދޭތެރޭ އެ ފަރާތުން ފޯރުކޮށްދޭ ޚިދުމަތުގެ ފެންވަރު ރަނގަޅުކަން ދައްކުވައި ދޭ ކަމެއް ކަމަށް އީކުއޭޓަރ ވިލެޖުން ބުނެއެވެ.
މި ހަފްލާގައި ރާއްޖޭގެ ގިނަ ރިސޯޓުތައް ވަނީ އެކި ކެޓަގަރީތަކުން އެވޯޑު ހާސިލްކޮށްފައެވެ. މީގެ އިތުރުން އިތުރުން މި ސަރަހައްދުގެ އެންމެ މަޤުބޫލު މަންޒިލާއި، އެންމެ މަޤްބޫލު ޑައިވިންގް މަންޒިލުގެ އިތުރުން އެންމެ ރަނގަޅު ޓުއަރިޒަމް ބޯޑު އެވޯޑު ރާއްޖޭގެ އެމްއެމްޕީއާރްސީން ވަނީ ހޯދާފައެވެ.
އައްޑޫ އެއާޕޯޓް ވެސް އޮތް ގަމުގައި ހިންގަމުން އަންނަ މި ސިޓީ ހޮޓަލަކީ މިހާތަނަށް ޓޫރިޒަމް ދާއިރާ އިން އެތައް އެވޯޑެއް ވެސް ހޯދާފައިވާ ޓޫރިސްޓުންގެ މެދުގައި މަގުބޫލުތަކެވެ. އެގޮތުން ސަޓާ ލީޑިންގް ހޮޓެލް އެވޯޑު މިދިޔަ އަހަރާއި 2019 ވަނަ އަހަރު އަދި 2017 ވަނަ މޯލްޑިވްސް ޓްރެވެލް އެވޯޑު ވަނީ ހާސިލްކޮށްފައެވެ. މިއީ ވޯލްޑް ޓްރެވެލް އެވޯޑެއް އީކުއޭޓަރ ވިލެޖުން ހޯދި ފުރަތަމަ ފަހަރެވެ.