އިންތިހާބީ ރައީސް ޑރ. މުހައްމަދު މުއިއްޒު ހުވާކުރައްވަން ބާއްވާ ރަސްމިއްޔާތު ކަވަރު ކުރަން ބޭނުންވާ ބޭރުގެ މީޑިއާތަކަށް ރައްޔިތުންގެ މަޖިލީހުން ފުރުސަތު ހުޅުވާލައިފި އެވެ.
އެ އިދާރާ އިން ކުރި އިއުލާނެއްގައި ބުނީ އެކަމަށް ޝައުގުވެރިވާ މީޑިއާތަކަށް އެޕްލައިކުރުމުގެ ފުރުސަތު މި މަހުގެ 31 އާ ހަމައަށް ހުޅުވާލާފައިވާ ކަމަށެވެ.
މަޖިލީހުގެ އިދާރާ އިން ބުނީ ހުވާގެ ރަސްމިއްޔާތު ކަވަރުކުރަން ބޭނުންވާ ބޭރުގެ މީޑިއާތަކުން ވިސާ އާއި އެހެނިހެން ހުއްދަތައް ހޯދުމަށް ބޭނުންވާ ލިޔެކިއުންތައް ހަމަޖައްސައި ދިނުމުގެ އިންތިޒާމް މަޖިލީހުން ކޮށްދޭނެ ކަމަށެވެ. ނަމަވެސް، ބޭރުގެ ނޫސްވެރިންގެ ކެއުމާއި ތިބުމުގެ ހަރަދުތައް ހަމަޖައްސަން ޖެހޭނީ އެ މީޑިއާއެއްގެ އަމިއްލަ ހަރަދުގައި ކަމަށް މަޖިލީހުން ބުންޏެވެ.
މުއިއްޒު ހުވާކުރެއްވުމުގެ ރަސްމިއްޔާތު ބާއްވަން ހަމަޖެހިފައި ވަނީ އަންނަ މަހުގެ 17 ވަނަ ދުވަހުގެ ހަވީރު ޖުމްހޫރީ މައިދާންގަ އެވެ. މިކަމުގެ ތައްޔާރީތައް މަޖިލީހުގެ އިދާރާ އިން އަންނަނީ ވަމުންނެވެ.
މުއިއްޒު އިންތިހާބު ކާމިޔާބުކުރެއްވީ މިހާރުގެ ރައީސް އިބްރާހީމް މުހައްމަދު ސޯލިހާ ވާދަކުރައްވައި މިދިޔަ މަހުގެ 30 ގަ އެވެ.