ބޭރުގެ ޤައުމުތަކަށް ކުރަން ޖެހޭ ދުރު ރާސްތާ ދަތުރުތަކަށް ހާއްސަކޮށް މޯލްޑިވިއަންއިން ވައިޑް ބޮޑީ އެއާ ކްރާފްޓުތައް ގެންނާނެ ކަމަށް އިންތިހާބީ ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.
ހޮޓަލިއަރ މޯލްޑިވްސްއިން އިންތިޒާމުކޮށްގެން ބޭއްވި ޖީއެމް ފޯރަމުގައި ޑރ. މުޢިއްޒު ވަނީ ރާއްޖޭގެ ފަތުރުވެރިކަން ކުރިއަރުން ކުރައްވާނެ ބައެއް ކަންކަން ހާމަކޮށްފައެވެ. އެގޮތުން ޤައުމީ އެއާލައިން މޯލްޑިވިއަންގެ ހިންގުން ހަރުދާނާ ކުރުމާއި އެމްއޭސީއެލް ފައިދާވެ ތަރައްޤީއަށް މަސައްކަތް ކުރެވޭ ކުންފުނިއަކަށް ހަދާނެ ކަމަށް އެމަނިކުފާނު ވިދާލުވިއެވެ.
އިންތިހާބީ ރައީސްގެ ވާހަކަފުޅުގައި، ވަނީ މޯލްޑިވިއަންއިން ބޭރުގެ އެހެން މާކެޓުތަކަށް ދަތުރު ކުރުމަށް އައު އުޅަނދުތައް ގެންނާނެ ކަމަށް ވިދާޅުވެފައެވެ.
"އަލުން މި ހުޅުވުނު ޗައިނާ މާކެޓަށާއި އަދި އެހެނިހެން މާކެޓުތަކަށް ދަތުރު ފެށުމަށް ވައިޑް ބޮޑީ އެއާކްރާފްޓުތައް ގެންނާނަން. މިއީ މާކެޓުތަކުން ރާއްޖެއަށް ފަތުރުވެރިން އައުން އިތުރު ކުރުމުގެ މަޤްސަދުގައި އަޅުގަނޑުމެން ގަންނަ ތަކެތި" ޑރ. މުޢިއްޒު ވިދާޅުވިއެވެ.
ބޭރު މާކެޓުތަކަށް ދަތުރުކުރަން ބޯޓުތައް ގަންނާނެ ކަމަށް އިންތިހާބީ ރައީސް ވިދާޅުވެފައިވާއިރު، މޯލްޑިވްސް ފަންޑް މެނޭޖްމެންޓް ކޯޕަރޭޝަން އަދި މޯލްޑިވިއަން ވަނީ ބޭރު ދަތުރުތަކަށް އައު އެއާލައިނެއް ހެދުމަށް ފަހުމުނާމާއެއްގައި ސޮއިކޮށްފައެވެ. މިއީ ޗައިނާ ޔޫރަޕް އަދި ރަޝިއާ މާކެޓަށް ހާއްސަކޮށް ދަތުރު ފެށުމަށް ކުރެވޭ މަސައްކަތެއް ކަމަށް އެ ކުންފުނިތަކުން ވަނީ ބުނެފައެވެ.
މިދިޔަ އޯގަސްޓް މަހުގެ 30 ވަނަ ދުވަހު ސޮއިކުރެވުނު އެއްބަސްވުމުގެ ދަށުން މުޅިން އައު އެއާލައިނެއް ޤާއިމް ކުރުމަށް ވަނީ ނިންމާފައެވެ.