އުރީދޫގެ ގޭމިން ފެސްޓިވަލް ފަށައިފި

އުރީދޫގެ ގޭމިން ފެސްޓިވަލް ފަށައިފި އެވެ.

"އުރީދޫ ނޭޝަން ގޭމާސް ލޭންޑް" ގެ ނަމުގައި ކުރިއަށް ގެންދާ ފެސްޓިވަލް ރޭ ފެށީ ހުޅުމާލޭގައި ދާދި ފަހުން ހުޅުވި އުރީދޫ މޯލްޑިވްސްފެ ހެޑްކުއާޓަރުގަ އެވެ. ފެސްޓިވަލަށްރަޖިސްޓްރީކޮށްފައިވާ 350 އަށް ވުރެ ގިނަ ބައިވެރިންނާއެކު ކުރިއަށްދާ ފެސްޓިވަލްގައި އުރީދޫ ނޭޝަން ޕަބްޖީ މޮބައިލް ގްރޭންޑް ފިނާލޭ، ކޮސްޕްލޭ، އެފްސީ24، ރޭސިން ސިމް އަދި ޓެކްކެން މުބާރާތް މި ހަފްތާ ބަންދު ތެރޭގައި ކުރިއަށްދާނެ ކަމަށް އުރީދޫން ބުންޏެވެ.

މި މުބާރާތް ރޭ އިފުތިތާހު ކޮށްދެއްވީ މޯލްޑިވްސް އޮލިމްޕިކް ކޮމިޓީގެ ސެކްރެޓަރީ ޖެނެރަލް ތަމޫޙް އަޙްމަދު ސަޢީދާއި އުރީދޫ މޯލްޑިވްސްގެ ޗީފް ޓެކްނޮލޮޖީ އޮފިސާ ބައްސާމް އަލް މޮމާނީއާގެ އިތުރުން އުރީދޫ މޯލްޑިވްސްގެ ޗީފް ކޮމާޝަލް އޮފިސާ ޙުސައިން ނިޔާޒެވެ.

މި ގޭމާސް ފެސްޓިވަލް ކުރިއަށް ދާނީ މާދަމާ ރެއާ ހަމައަށެވެ.

މި ގޭމިން ފެސްޓިވަލްގައި ކުރިއަށްދާ މުބާރާތްތަކުން މޮޅުވާ ފަރާތްތަކަށް ބޮޑެތި ފައިސާގެ އިނާމުތަކުގެ އިތުރުން ހުރިހާ އުމުރުފުރައެއްގެ ގޭމަރުންނަށްވެސް މަޖާ އަދި ހިތްގައިމު ތަޖުރިބާއެއް ކުރުމުގެ ފުރުސަތު ލިބިގެންދާނެކަމަށް އުރީދޫއިން ބުނެއެވެ.

މި މުބާރާތަށް ޖުމްލަ 1،85،000 ރުފިޔާގެ ފައިސާ އިނާމު ހުށަހަޅާފައިވެ އެވެ.

އެގޮތުން ޕަބްޖީ މުބާރާތުގެ ފައިނަލް މެޗްތަކުން ވަނަ ހޯދާ ޓީމުތަކަށް ޖުމްލަ 89،000ރ. ގެ ފައިސާގެ އިނާމު ލިބިގެންދާއިރު، މުބާރާތުގެ އެހެން ޓޯނަމަންޓްތަކުން ވަނަ ހޯދާ ފަރާތްތަކަށް ލިބޭ ފައިސާ ގެ އިނާމު ބަހާލެވިފައި ވަނީ 40،000ރ. ގެ ޕްރައިޒް ޕޫލަކާ އެކު އީއޭއެފްސީ (ފީފާ)، 25،000ރ. ރުފިޔާގެ ޕްރައިޒް ޕޫލަކާއެކު ރޭސިން ސިމް ޗެލެންޖް، 10،000ރ. ގެ ޕްރައިޒް ޕޫލަކާއެކު ޓެކެން މުބާރާތް އަދި 10،000ރ. ގެ ޕްރައިޒް ޕޫލަކާއެކު ކޮސްޕްލޭ މުބާރާތެވެ.

އުރީދޫން ނިނީ ގޭމާސް ލޭންޑަކީ ހަމައެކަނި މުބާރާތްތަކަށް ވުރެ ގޭމިން ފެސްޓިވަލެއް ގޮތައް ކުރިއަށް ގެންދާ ހަރަކާތަކަށްވާތީ ގޭމިން ފެސްޓިވަލަށް ޒިޔާރަތްކުރާ ފަރާތްތަކަށް ކްލޯ މެޝިންގެ އިތުރުން ވީއާރް ގޭމިންގް ތަޖުރިބާކޮށްލާ މުބާރާތުގައި ބައިވެރިވާ ފަރާތްތަކުގެ ކުޅުން ބަލާލައި ރައްޓެހިންނާއެކު އުފާވެރި ވަގުތުކޮޅެއް ހޭދަކޮށްލެވޭނެ ކަމަށެވެ.

މާދަމާ ރޭ މުބާރާތްތައް ނިންމާލައި ވަނަތައް ހަވާލުކުރާނެ އެވެ.