ފަލަސްތީނާއި އެއްކޮޅަށް ދިވެހިންގެ އަޑުގަދަ ވަމުންދާ މި ދަނޑިވަޅުގައި އިޒްރޭލު މީހުން ރާއްޖެ ނައައުމަށް އެ ޤައުމުން އެޑްވައިޒަރީއެއް ނެރެފިއެވެ.
އެ ޤައުމުން އީއްޔެ ނެރުނު އެޑްވަޒަރީގައި ބުނީ، އެޤައުމާއި ދެކޮޅަށް ރާއްޖޭގައި އޮތް މާހައުލު ވަރުގަދަ ވަމުންދާ ކަމަށެވެ. މި ސަަބަބާއި ހުރެ އެ ޤައުމުގެ ރައްޔިތުން ރާއްޖެ ޒިޔާރަތް ކުރުން ރަނގަޅު ނޫން ކަމަށް އެ ޤައުމުގެ ޙާރިޖީ ވުޒާރާއިން ވަނީ ބުނެފައެވެ.
އިޒްރޭލު މީހުން ރާއްޖެ ނައައުމަށް އެ ޤައުމުން އެދުނުއިރު، ވޭތުވެ ދިޔަ 5 އަހަރު ތެރޭ އެ ޤައުމުން 50،000 އަށް ވުރެ ގިނަ ފަތުރުވެރިން ރާއްޖެ އައިސްފައިވެއެވެ. އޭގެ ތެރޭގައި އިޒްރޭލުގެ ކުރީ އިޒްރޭލުގެ ބޮޑުވަޒީރު ނަފްތާލީ ބެނެޓް 2021 ވަނަ އަހަރު ޗުއްޓީ ހޭދަކުރުމަށް ކުރި ޒިޔާރަތް ފާހަގަކޮށްލެވެއެވެ.
ފަލަސްތީނުގެ ރައްޔިތުންނާއި ދެކޮޅަށް އިޒްރޭލުން ހިންގަމުންދާ ލާ އިންސާނީ ޖަރީމާތަކާއި ދެކޮޅަށް ހުރިހާ ދިވެހިން ހެން ދަނީ އަޑު އުފުލަމުންނެވެ. އަދި ޤައްޒާއަށް އެހީ ވުމަށް، ޓެލެތޯން ބޭއްވުމާއި، ރައްރަށުގައި ފަންޑް ރައިޒިން ހަރަކާތްތައް ދަނީ ބާއްވަމުންނެވެ. މީގެ އިތުރުން ވިޔަފާރިތަކުންވެސް ބޮޑެތި އަދަދުތަކުން ދަނީ ފައިސާ ހަދިޔާ ކުރަމުންނެވެ.
ރާއްޖޭގެ ފަރާތުން ލިބޭ ގިނަ އެހީތަކާއި ހަވާލުވެ ޤައްޒާގެ ރައްޔިތުންނަށް އެހީވުމުގައި ހަރަކާތްތެރިވަނީ އިންޓަނޭޝަނަލް އެއިޑް ކެމްޕެއިން އައިއޭސީންނެވެ. އެ ޖަމީއްޔާއިން އެންމެ ފަހުން ފެށި ކެމްޕެއިންތަކުންވެސް މިހާތަނަށް 15 މިލިއަނަށް ވުރެ ގިނަ ރުފިޔާ ލިބިފައިވާ ކަމަށް ވަނީ ހާމަކޮށްފައެވެ.