ފަލަސްތީނަށް އެހިވާން ރާއްޖޭގައި ހުޅުވާފައިިވާ ފަންޑަށް މިހާތަނަށް 12 މިލިއަނަށް ވުރެ ގިނަ ރުފިޔާ ލިބިފައިވާ ކަމަށް އިންޓަނޭޝަނަލް އެއިޑް ކެމްޕޭން (އައިއޭސީ) ގެ ރާއްޖެ ގޮފިން ބުނެފި އެވެ.
"އަހަރެމެން ފަލަސްތީނާއެކު" ފަންޑަށް ގިނަ ބަޔަކު އެކި ގޮތްގޮތުން އަންނަނީ ފައިސާ ހަދިޔާކުރަމުންނެވެ. އެގޮތުން ފަރުދީ ގޮތުންނާއި ޖަމައީ ގޮތުން ތަފާތު ހަރަކާތްތައް ވެސް ބާއްވައިގެން ފައިސާ އެއްކޮށް، ފަންޑަށް ހަދިޔާކުރުމުގެ ހަރަކާތްތައް ރާއްޖޭގެ އެކި ހިސާބުތަކުގައި އަންނަނީ ކުރަމުންނެވެ.
މި ފަންޑް އައިއޭސީން ހުޅުވީ މި މަހުގެ 7 ގައި އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ދޭން ފެށި ހަމަލާތަކާ ގުޅިގެންނެވެ. އެކަމަކު އޭގެ ކުރިން ވެސް ދިވެހިންގެ ނަމުގައި އެ ގައުމުގެ ރައްޔިތުންނަށް އައިއޭސީ މެދުވެރިކޮށް އައި ތަފާތު އެހީތައް ފޯރުކޮށް ދެމުންނެވެ.
އައިއޭސީން ވަނީ ފަލަސްތީނުގެ ރައްޔިތުން މިހާރު ތިބި ނިކަމެތި އަދި ބިރުވެރި ހާލަތުގައި ވީހާ ވެސް ގިނަ ބަޔަކު އެހީތެރިކަން ފޯރުކޮށް ދޭން އެދިފަ އެވެ. އެގޮތުން ފަންޑަށް ލިބުނު ފައިސާ އިން މިދިޔަ ހަފުތާގެ ފަހުކޮޅު 200 އާއިލާއަކަށް 500 ޑޮލަރުގެ މަގުން ފައިސާ ބަހާފައިވާ ކަމަށް ވެސް އައިއޭސީން ބުންޏެވެ.
އައިއޭސީގެ އިތުރުން މޯލްޑިިވްސް ރެޑް ކްރެސެންޓުން ވެސް ފަންޑަށް ހުޅުވާފައިވާ އިރު، ރާއްޖޭގެ ގިނަ މީޑިއާތަކެއް ބައިވެގެން މިދިޔަ ހަފުތާގައި ބޭއްވި ޓެލެތޯނަކުން ވެސް 12،989،372.72ރ. ރުފިޔާ އާއި 8،672.38 ޑޮލަރު ލިބިފައިވެ އެވެ.