ފުޓްބޯޅައިގެ މައިދާނުގައި ބަލަކްގެ ނަމުން މަޝްހޫރު ކުރީގެ ޓޫރިޒަމް މިނިސްޓަރު އަލީ ވަހީދު އެޓޯލްސް އެފްސީގެ ހެޑް ކޯޗަކަށް ހަމަޖައްސައިފި އެވެ.
އޭނަ ޓީމްގެ ހެޑް ކޯޗަކަށް ހަމަޖެއްސި އިރު، އެސިސްޓެންޓް ޓެންޓަކަށް ހަމަޖެއްސީ ކުރިން ނިއުރޭޑިއަންޓް ސްޕޯޓްސް ކްލަބަށް ކުޅެފައިވާ އަހުމަދު ނިޔާޒް (ނިޔައްޓޭ) އެވެ.
އެޓޯލްސް އެފްސީ އަކީ ރާއްޖޭގެ ފުޓްބޯޅައިގެ ތެރެއަށް އަލަށް ވަންނަން މަސައްކަތް ކުރާ ކްލަބެކެވެ. އަލީ ވަހީދު އިސްކޮށް ހުންނަައިގެން އުފެއްދި ކުލަބް ރަސްމީކޮށް ލޯންޗްކުރީ މި އަހަރުގެ ޖުލައި 20 ގަ އެވެ.
މީގެ ކުރިން އަލީ ވަހީދު ވަނީ ނިއުރޭޑިއަންޓާއި ގައުމީ ޓީމުގެ މެނޭޖަރުގެ މަގާމާއި ނިއުރޭޑިއަންޓްގެ ޗެއާމަންގެ މަގާމު ވެސް އަދާކުރައްވައިފަ އެވެ. އަދި ފާއިތުވި ދެ އަހަރެއްހާ ދުވަހު އޭނަ އިނގިރޭސިވިލާތުގެ ސްޕޯޓިން ލަންޑަނަށް ކޯޗުކޮށް ދީފައިވެ އެވެ.