މިދިޔަ އަހަރުގެ ސެޕްޓެމްބަރު މަހާއި އަޅާ ބަލާއިރު، މިއަހަރު ސެޕްޓެމްބަރު މަހު ރާއްޖެއިން ބޭރު ކުރި މުދަލުގެ އަގު 43 އިންސައްތަ ދަށަށް ގޮސްފައިވާ ކަމަށް މޯލްޑިވްސް ކަސްޓަމްސް ސާވިސްއިން ހާމަކޮށްފިއެވެ.
ކަސްޓަމްސްއިން އާންމުކޮށްފައިވާ ތަފާސް ހިސާބުތައް ދައްކާގޮތުން، 2022 ވަނަ އަހަރު ސެޕްޓެމްބަރު މަހު ރާއްޖެއިން ބޭރު ކުރެވުނު މުދަލުގެ އެފްއޯބީ އަގަކީ 149 މިލިއަން ރުފިޔާއެވެ. ނަމަވެސް މިއަހަރު ސެޕްޓެމްބަރު މަހު އެއަދަދު ބޮޑުތަނުން ދަށްވެފައެވެ. އެގޮތުން މިއަހަރު އެ މުއްދަތުގައި ބޭރުކުރެވުނީ 86 މިލިއަން ރުފިޔާގެ މުދަލެވެ. މިއީ 43 އިންސައްތައިގެ ދަށްވުމެއް ކަމަށް ކަސްޓަމްސްއިން ބުނެއެވެ.
ސެޕްޓެމްބަރު މަހުގެ އެކްސްޕޯޓް ދަށްވެފައިވާއިރު، އިމްޕޯޓްވެސް ވަނީ ދައްވެފައެވެ. އެގޮތުން މިދިޔަ އަހަރު ސެޕްޓެމްބަރު ރާއްޖެއަށް އެތެރެކުރުވުނު މުދަލުގެ ސީއައިއެފް އަގަކީ 4.4 ބިލިއަން ރުފިޔާއެވެ. ނަމަވެސް މި އަދަދު މިއަހަރުގެ މިމުއްދަތުގައި ހުރީ 4.3 ބިލިއަން ރުފިޔާގައެވެ. މިއީ ތިން އިންސައްތައިގެ ދަށްވުމެކެވެ.
Monthly Statistics – September 2023
🔹Major Importing categories
🔸Exporting commodities
🔹top 5 importing / exporting countries.🔗 https://t.co/HHWXd9JgAR@MariyaDidi@AbdullaSh4reef pic.twitter.com/o32D4eiLqx
— Maldives Customs Service (@CustomsMv) October 21, 2023
ރާއްޖެއަށް ކުރެވޭ އިންޕޯޓް އަދި އެކްސްޕޯޓް ދަށްވި ނަމަވެސް މިދިޔަ އަހަރާއި އަޅާބަލާއިރު ކަސްޓަމްސްއަށް ލިބުނު އާމްދަނީ މިދިޔަ އަހަރާއި އަޅާބަލާއިރު ސެޕްޓެމްބަރު މަހު އިތުރުވެފައެވެ. އެގޮތުން މިދިޔަ އަހަރު 350 މިލިއަން ރުފިޔާ ލިބުނުއިރު، މިއަހަރު ލިބިފައިވަނީ 360 މިލިއަން ރުފިޔާއެވެ. މިއީ 3 އިންސައްތައިގެ އާމްދަނީގެ ކުރިއެރުމެކެވެ.
މިދިޔަ އަހަރު އެންމެ ގިނައިން ރާއްޖެއަށް މުދާ އެތެރެކޮށްފައިވަނީ އޮމާން، އިންޑިއާ އަދި ޔޫއޭއީންނެވެ. އެގޮތުން އޮމާނުން 883 މިލިއަން ރުފިޔާގެ މުދާ އެތެރެކޮށްފައިވާއިރު އިންޑިއާއިން 681 މިލިއަން ރުފިޔާގެ މުދާ އެތެރެކޮށްފައިވާއިރު، ޔޭއޭއީން ވަނީ 500 މިލިއަން ރުފިޔާގެ މުދާ އެތެރެކޮށްފައެވެ. އެންމެ ގިނައިން ބޭރުކޮށްފައިވަނީ ތައިލޭންޑް އިންގިރޭސިވިލާތް އަދި ފަރަންސޭސި ވިލާތަށެވެ.
މިއަހަރު ސެޕްޓެމްބަރު މަހު ރޯޔަލްޓީގެ ގޮތުގައި 954،259.07ރ. ލިބިފައިވާ ކަމަށް ކަސްޓަމްސްއިން ވަނީ ހާމަކޮށްފައެވެ. މި މުއްދަތުގައި ރާއްޖެ 103 ބޯޓެއް އައިއިރު، 105 ބޯޓެއް ވަނީ ފުރާފައެވެ.