އިންތިހާބީ ރައީސް ޑރ. މުހައްމަދު ބޭނުންވެވަޑައިގަންނަވަނީ އަންނަ އަހަރުގެ ދައުލަތުގެ ބަޖެޓް 49 ބިލިއަން ރުފިޔާގައި ހިފަހެއްޓުމަށް ކަމަށްއެ މަނިކުފާނުގެ ބަޖެޓް ކޮމިޓީގެ މެންބަރު ގުރައިދޫ ދާއިރާގެ މަޖިކިސް މެންބަރު ގައްސާން މައުމޫން ވިދާޅުވެއްޖެ އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް މި މަހުގެ ނިޔަލަށް ނިންމުމަށް ފިނޭންސް މިނިސްޓްރީން މިހާރު އަންނަނީ މަސައްކަތްކުރަމުންނެވެ. އަދި ބަޖެޓް 50 ބިލިއަނަށް ވުރެ އިތުރުވެދާނެ ކަމަށް ވެސް ބުނެފައިވެ އެވެ. ބަޖެޓް އެކުލަވާލުމުގެ މަސައްކަތް ކުރަމުން އަންނަ އިރު މިކަމަށް މުއިއްޒު ފަރާތުން ބައިވެރިވެ އެވެ.
މި މަސައްކަތްތަކާ ގުޅޭ ގޮތުން ސަންގު ޓީވީގައި ގައްސާން ވިދާޅުވީ މުއިއްޒުގެ އެންމެ ފުރަތަމަ ނިންމެވި ނިންމެވުންތަކުގެ ތެރޭގައި ވެސް ހިމެނެނީ ސަރުކާރުގެ ހަރަދު ވަކިވަރަކަށް ވުރެ ބޮޑުނުކުރުން ކަމަށެވެ. އެގޮތުން 49 ބިލިއަން ރުފިޔާގެ ތެރޭގައި ބަޖެޓް ހިފެހެއްޓެވުމަށް އިންތިހާބީ މުއިއްޒު ނިންމަވާފައިވާ ކަމަށް ވިދާޅުވި އެވެ.
"އިންތިހާބީ ރައީސްގެ އޮފީހުން މިހާރު ހާމަކޮށްފައި ވަނީ 49 ބިލިއަން ރުފިޔާގެ ތެރޭގައި ބަޖެޓު ހިފަހައްޓަވަން. އެއީ، އެންމެ ފުރަތަމަ ރައީސް [މުއިއްޒު] ނިންމެވި ކަމަކީ." އޭނަ ވިދާޅުވި އެވެ.
ގައްސާން ފާހަގަކުރެއްވި ގޮތުގައި އަންނަ އަހަރު ބަޖެޓް އެކުލަވާލުމުގައި އިންތިހާބީ ރައީސްގެ ވިސްނުމަކީ ބައިނަލްއަގުމީ މުޖުތަމަ އާއި ކްރިޑިޓް ރޭޓިން ހަދާ ފަރާތްތަކުން ވެސް ގަބޫލު ކުރާ މިންގަނޑުގެ ތެރެއަށް ފެތޭ ބަޖެޓެއް އެކުލަވާލުމާއި ފުރަތަމަ ދުވަހުން ފެށިގެން އެ އަމާޒަށް ވާސިލްވާން މަސައްކަތް ފަށައިގެން ކުރިއަށްދާ ގެންދިއުން ކަމަށެވެ.
"އަޅުގަނޑުމެންގެ ދަރަނި ޖީޑީޕީއަށް ޖެހޭ ނިސްބަތް ކުޑަކުރުން. މިހާރު [ދަރަނި] މިއޮތީ ޑަބަލް ޑިޖިޓްސްގައި، ފުދޭވަރަކަށް މަތީގައި. އެހެން ވެގެން ރޭޓިންގް ދަށްވެގެން މިއުޅެނީ،" ގައްސާން ވިދާޅުވި އެވެ. "ބަޖެޓު ކުޑަވިޔަސް، މި މަސައްކަތް ކުރަން ދަންނަ ވެރިޔަކު ހަވާލުވާ ހިސާބުން، އެއީ ރައީސް މުއިއްޒު ހަވާލުވެވަޑައިގަންނަވާ ހިސާބުން، މި ބަޖެޓުގެ ތެރޭގައި ރައްޔިތުން އެކްސްޕެކްޓް [އުންމީދު] ކުރާ ގިނަ ގުނަ އުމްރާނީ ތަރައްގީގެ މަސައްކަތްތަކާއި ރައްޔިތުންނަށް ފައިދާވާ އެހެން މަސައްކަތްތައް ވެސް ކުރެވޭނެ."
ބަޖެޓު ކޮމިޓީގެ މަސައްކަތްތަކާ ގުޅޭ ގައްސާން ވިދާޅުވީ ކެމްޕެއިން ތެރޭގައި މުއިއްޒު ވައުދުވެވަޑައިގެންފައިވާ ގޮތަށް މި ސަރުކާރުން ފަށާފައިވާ މަޝްރޫއުތައް ވެސް ނުހުއްޓި ކުރިއަށް ދިޔުމަށްޓަކައި އަންނަ އަހަރުގެ ބަޖެޓްގައި އެ މަޝްރުުއޫތައް ހިމަނާނެ ކަމަށެވެ. އަދި މުއިއްޒުގެ ވެރިކަމުގެ ފުރަތަމަ އަހަރު ހިންގުމަށް ބޭނުންވާ މަޝްރޫއުތަކަށް ވެސް އަންނަ އަހަރަށް ލަފާކޮށް ހުށަހަޅާ ބަޖެޓުގައި މިހާރު ހިމަނާފައިވާނެ ކަމަށް ވިދާޅުވި އެވެ.
އެގޮތުން ބަޖެޓުގައި 200 މިލިއަން ރުފިޔާ އިންތިހާބީ ރައީސްގެ އޮފީހުގެ ފަރާތުން އިތުރުކޮށްފައިވާނެ ކަމަށާއި މުއިއްޒު ހުވާކުރައްވާ ތާރީހު ކަމަށްވާ އަންނަ މަހުގެ 17 އިން ފެށިގެން މި އަހަރުގެ ޑިސެމްބަރު 31 އަށް ކުރަން ޖެހޭ ހަރަދުތައް ކުރުމަށް ކަމަށް ގައްސާން ވިދާޅުވި އެވެ. އަދި އެ އަދަދު ހިމެނެނީ މުއިއްޒުގެ 100 ދުވަހުގެ ވައުދުތަކަށް ވެސް އިސްކަންދީގެންނެވެ.
"ދިވެހި ރައްޔިތުން ވަރަށް ހިތްހަމަޖެހޭ މަންޒަރެއް ރައީސް މުއިއްޒު ހުވާ ކުރެއްވުމާއެކު ފެނިގެން ދާނެ." ކުރީގެ ރައީސް މައުމޫން އަބްދުލް ގައްޔޫމްގެ ދަރިކަލުން ގައްސާން ވިދާޅުވި އެވެ.