އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާ އިންސާނީ ޢަމަލުތައް ކުއްވެރިކޮށް ފަލަސްތީނާއ އެކު ވާކަން ހާމަކުރުމަށް އައްޑޫގައި ބޮޑު އެއްވުމެއް ބާއްވަން ނިންމައިފި އެވެ.
ހިތަދޫ ސިޓީ ސްކޮޔާގައި ހުކުރު ދުވަހު ހަވީރު ބާއްވާ މި އެއްވުމަކީ، ކައުންސިލާއި އައްޑޫގެ މަދަނީ ޖަމީއްޔާ ޖަމާޢަތްތައް އެކުވެގެން ބާއްވާ އެއްވުމެކެވެ. މި އެއްވުމަކީ އައްޑޫގެ ރައްޔިތުން ތިބީ ފަލަސްތީނާއެކުކަން ހާމަކޮށް، އިޒްރޭލުން ފަލަސްތީނުގެ ރައްޔިތުންނާއި ދެކޮޅަށް ހިންގަމުންދާ ލާ އިންސާނީ ޢަމަލުތައް ކުއްވެރި ކުރުމެވެ.
އެއްވުން ފެށުމަށް ހަމަޖެހިފައި ވަނީ އަންނަ ހުކުރު ދުވަހު ހަވީރު 4:00 ގަ އެވެ.
ކައުންސިލުން އިސްނަގައިގެން ކުރިއަށް ގެންދާ އެއްވުމުގައި ބައިވެރިވާން ބޭނުންވާ މަދަނީ ޖަމީއްޔާތަކުން ބުރާސްފަތި ދުވަހުގެ ހަވީރު 6:00 ޖެހުމުގެ ކުރިން 9948762 ގުޅައި އެކަން އެންގުމަށް ކައުންސިލުން އެދެ އެވެ.
މި މަހުގެ 7 އިން ފެށިގެން ފަލަސްތީނުގެ ގައްޒާ ބަނދުކޮށް އިޒްރޭލުން ދަނީ ހަމާސް ޖަމާޢަތާއި ދެކޮޅަށް ހަނގުރާމަ އިއުލާންކޮށްފަ އެވެ. ނަމަވެސް އިޒްރޭލުން ހަނގުރާމައެއް ކަމަށް ބުނެ ޤައްޒާގެ އެތައް ބަޔަކު ވަނީ ޝަހީދު ކޮށްލާފައެވެ. އެގޮތުން އެންމެ ފަހުގެ ތަފާސް ހިސާބުތައް ދައްކާގޮތުން ފަލަސްތީނުގެ 5،000 އަށް ވުރެ ގިނަ މީހުން ޝަހީދު ކޮށްލާފައިވާއިރު، މީގެ ތެރޭގައި 2000 އެއްހައި ކުޑަކުދިން ހިމެނެއެވެ.
ދުނިޔޭގެ އެކި ކަންކޮޅުތަކުގައި އިޒްރޭލާއި ދެކޮޅަށް ދަނީ ވަރުގަދައަށް އަޑު އުފުލައި މި ލާއިންސާނީ ޖަރީމާ ހުއްޓާލުމަށް ގޮވާލައި މުޒާހަރާ ކުރަމުންނެވެ.