މާލެ އިން އައްޑު އަށް ޓްރާންސްޝޕިްމަންޓްގެ ޚިދުމަތް ދިނުމަށް ކުރި ފުރަތަމަ ދަތުރު ކާމިޔާބު ކަމަށާއި ކުރިއަށް އޮތް ހައެއްކަ މަސް ދުވަހުގެ ތެރޭގައި މިކަމުގެ ފައިދާ އައްޑޫގެ ވިޔަފާރިވެރިންނަށް ކުރަން ފަށާނެ ކަމަށް މޯލްޑިވްސް ސްޓޭޓް ޝިޕިން (އެމްއެސްއެސް) އިން ބުނެފި އެވެ.
އެ ކުންފުނީގެ މެނޭޖިން ޑިރެކްޓަރު މުހައްމަދު ނާޒިމް ރާއްޖެ ޓިވީގައި ވިދާޅުވީ މާލެ އިން ރާއްޖޭގެ އެންމެ ދެކުނަށް ޓްރާންސްޝިޕްމަންޓް ހިދުމަތް ފެށުނީ އެކަން ކުރަން އުޅޭތާ ގިނަ ދުވަސްތަކެއް ފަހުން ކަމަށެވެ. އެގޮތުން އެކަށީގެންވާ ބޯޓެއް ހޯދާތާ އަހަރެއްހާ ދުވަސްވި ފަހުން ބޯޓެއް ލިބުނީ މި މަހުގެ ތެރޭގައި ކަމަށާއި އެއާއެކު ދަތުރުތައް މިހާރު ފެށުނީ ކަމަށް ވެސް ވިދާޅުވި އެވެ.
މި ކޮންޓެއިނަރު އުފުލާ ބޯޓް، "އެމްއެސްއެސް އޯޕަލް" ގެ ދަތުރުތައް ފެށީ މި މަހުގެ 14 ގަ އެވެ. މި ބޯޓު ދަތުރު ކުރަނީ މާލެ އާއި އައްޑޫ ހިތަދޫ އަދި ކޫއްޑުއާ ދެމެދުގަ އެވެ.
MSS Opal arrived @adduport on her maiden voyage, today. She will be making a regular 10-day voyage between Malé and Addu. Embracing innovation and sustainability, we're charting a course to a brighter, greener future of decentralized transportation revolution in the Maldives. pic.twitter.com/log5B8G34S
— Maldives State Shipping (MSS) (@stateshippingmv) October 14, 2023
އެގޮތުން ބޯޓްގެ ފުރަތަމަ ދަތުރުގައި 750 ޓަނުގެ ހިލަ އާއި ހިލަވެލި ގެންގޮސްފައިވެ އެވެ.
ނާޒިމް ވިދާޅުވި ގޮތުގައި އައްޑޫގެ ވިޔަފާރިތަކަށް މި ދަތުރުތަކުގެ ސަބަބުން ވަރަށް ބޮޑު ލުއިތައް ލިބިގެންދާނެ އެވެ. އެގޮތު ކުރިއަށް އޮތް ހައެއްކަ މަސް ދުވަހުގެ ތެރޭގައި އައްޑޫގެ ވިޔަފާރިވެރިންނަށް ފައިދާވާން ފަށައި، އަގުހެޔޮކޮށް މުދާ ލިބުމުގެ ފުރުސަތު ފަހިވެގެން ދާނެ ކަމަށް ވިދާޅުވި އެވެ.
"އަޅުގަނޑުމެން ގަބޫލުކުރަނީ ކުރިއަށް އޮތް ހައެއްކަ މަސް ތެރޭގައި އައްޑޫގެ ވިޔަފާރިވެރިންނަށް މީގެ ފައިދާ ކުރަން ފަށާނެ ކަމަށް. އެ ރަށުގެ ވިޔަފާރިތަކަށް މުދާ އަގުހެޔޮކޮށް ފޯރުކޮށް ދެވޭނެ،" ނާޒިމު ވިދާޅުވި އެވެ. "އަދި މިއާ ގުޅިގެން އެ ކޮޅުގައި އެކި މަސައްކަތްތައް ވެސް ފެށޭނެ. މިސާލަކަށް ވެއަހައުސިން ކަހަލަ ކަންތައްތައް ހަމަ ލޯކަލް މުދާ އަޅުގަނޑުމެން މި އުފުލާތީވެ ވެއަހައުސިން ކަހަލަ ކަންކަން ކޮށްގެން އެ ބޭފުޅުންނަށް މާލެއިން ގަނެގެން އެއް ކޮންޓެއިނަރަކަށް ބައިވަރު ވިޔަފާރިވެރިންގެ މުދާ އަޅައިގެންގޮސް އެކޮޅު ވެއަހައުސަށް މުދާ ހުސްކޮށްގެން އެ މުދާތަށް ވިޔަފާރިވެރިންނަށް ޑިސްޓްރިބިއުޓް ކުރެވޭނެ."
އޭނަ ވިދާޅުވީ މހިޚިދުމަތަކީ އާ ހިދުމަތަކަށްވާތީ ވިޔަފާރިވެރިން އެކަމަށް ހޭލުންތެރިކުރުވުމަށް ޕްރޮގްރާމުތަކެއް ވެސް ހިންގުމަށް ހަމަޖެހިފައިވެ އެވެ. އެގޮތުން މިހާރު ވެސް އައްޑު އާއި މާލޭގައި ވިޔަފާރިވެރިންނަށް މައުލޫމާތު ފޯރުކޮށް ދީފައިވާ ކަމަށް ވިދާޅުވި އެވެ.