އުމްރާއަށް ގެންދާ ކުންފުނިތައް ހޯދުމަށް އިސްލާމިކް މިނިސްޓްރީން ހުޅުވާލި ފުރުސަތު މިމަހުގެ ނިޔަލަށް އިތުރު ކޮށްފައިވާ ކަމަށް އިސްލާމިކް މިނިސްޓްރީން ބުނެފިއެވެ.
އުމްރާއަށް މީހުން ގެންދިއުމުގެ ހުއްދައަށް ކުންފުނިތަކަށް އެދުމުގެ ފުރުސަތު ހުޅުވާލީ މިދިޔަ މަހުގެ 26 ވަނަ ދުވަހުއެވެ. އަދި ޕްރޮޕޯޒަލް ހުށަހެޅުމުގެ ފުރުސަތު 24 އޮކްޓޯބަރ އާއި ހަމައަށް ވަނީ ހުޅުވާލާފައެވެ. ނަމަވެސް މިމުއްދަތު މިމަހުގެ 31 ވަނަ ދުވަހުގެ 13:00 އާއި ހަމައަށް މިހާރު ވަނީ ފުރުސަތު އިތުރުކޮށް ހުޅުވާލާފައެވެ.
ދިވެހިރާއްޖެއިން މީހުން ޢުމްރާއަށް ގެންދިޔުމާބެހޭ އުސޫލުގެ 9ވަނަ މާއްދާގެ ރ ގައި، ޢުމްރާއަށް މީހުން ގެންދިޔުމަށް ކޮންމެ މީލާދީ އަހަރަކު 2 ފަހަރު އިޢުލާންކުރަން ވާނެކަމަށް ބަޔާންކޮށްފައިވެއެވެ. އެގޮތުން މިއީ މިއަހަރުތެރޭ އިޢުލާންކުރެވޭ 2 ވަނަ ފަހަރެވެ.
މި އުސޫލުގެ 9 ވަނަ މާއްދާގައި ދިވެހިރާއްޖެއިން ޢުމްރާއަށް މީހުން ގެންދިޔުމުގެ ހުއްދަ، ޢުމްރާއަށް މީހުން ގެންދިޔުމަށް ހުށަހަޅާ ކުންފުނިތަކުގެ ތެރެއިން ޝަރުތު ހަމަވާ ކުންފުނިތަކަށް ދެވޭނެކަމަށް ބަޔާންކޮށްފައިވާއިރު، ހުއްދައަށް ހުޅުވާލުމާއެކު މިހާރު ހުއްދައިގެ މުއްދަތު ހަމަވެފައިވާ ކުންފުނިތަކާއި، ނޮވެމްބަރު މަހަށް މުއްދަތު ހަމަވާ ކުންފުނިތަކަށް ހުއްދައަށް އެދި ހުށަހެޅުމުގެ ފުރުސަތު އޮންނާނެ ކަމަށް އިސްލާމިކް މިނިސްޓްރީން ބުނެއެވެ. އަދި ޝަރުތު ހަަމަވާ ކުންފުނިތަކަށް ހުއްދަދެވޭނީ 2 އަހަރުދުވަހަށް ކަމަށްވެސް މިނިސްޓްރީން ބުނެއެވެ.
ރާއްޖެ އިން ކޮންމެ އަހަރަކު ވެސް އަމިއްލަ ގްރޫޕްތަކާ ގުޅިގެން އުމްރާގެ އަޅުކަމަށް މީހުން ދެ އެވެ. ހައްޖާއި އުމްރާ އަށް މީހުން ގެންދިއުމުގެ މަސައްކަތް އަމިއްލަ ފަރާތްތަކުގެ އިތުރުން ހައްޖު ކޯޕަރޭޝަނުން ވެސް ކުރަމުން ދެ އެވެ.