ސަރުކާރުގެ ގެދޮރުވެރިޔާ އަދި ބިންވެރިޔާ ސްކީމުގެ ދެވަނަ ފިޔަވައްސަށް ހުށަހެޅި ފޯމުތަކުގެ އަދަދު، ފުރަތަމަ ފިޔަވައްސަށް ވުރެ އިތުރުވެފައިވާ ކަމަށް ސަރުކާރުން ހާމަކޮށްފިއެވެ.
މި ދެސްކީމަށް ފުރުތަަމަ ފިޔަވަހީގައި ލާފައިވަނީ ޖުމްލަ 35،861 ފޯމެވެ. އެއީ ގެދޮރުވެރިޔާ ސްކީމުގެ 2 ކޮޓަރީގެ ފްލެޓައް 6208 ފޯމާއި، 3 ކޮޓަރީގެ ފްލެޓައް 14،489 ފޯމާއި، ބިންވެރިޔާ ސްކީމަށް ޖޮއިންޓް އެޕްލިކޭޝަންތައް ހިމެނޭހެން ހުށަހަޅާފައިވަނީ 15،164 ފޯމެވެ.
ސަރުކާރުގެ ގެދޮރުވެރިޔާ އަދި ބިންވެރިޔާ ސްކީމަށް ހުށަހެޅުމުގެ ފުރުސަތު މިއަދު ހަމަވިރު ޖުމްލަ ގެދޮރުވެރިޔާ ސްކީމަށް ފްލެޓައް އެދި 21،247 އަދި ބިންވެރިޔާ ސްކީމުގެ ދަށުން ގޯއްޗަށް 19.347 މީހުން ވަނީ ފޯމު ލާފައެވެ. މިއާއެކު މި ދެސްކީމަށް 40،594 މީހަކު ވަނީ ފޯމު ލާފައި ކަމަށް ޕްލޭނިންގް މިނިސްޓްރީން ވަނީ ހާމަކޮށްފައެވެ.
މިއީ މި ދެ ސްކީމަށް ފުރަތަމަ ފިޔަވަހީގައި ފޯމު ލީ މީހުންނަށް ވުރެ 4733 މީހުން އިތުރުވުމެކެވެ.
މި ފިޔަވަހީގެ ދަށުން ގޯތި ދުކުރުމަށް ހަމަޖެހިފައި ވަނީ، ގިރާވަރު އުތުރުފަޅު ނުވަތަ އުތުރު ތިލަފަޅުން ކަމަށް ހައުސިން މިނިސްޓްރީން ވަނީ ކުރިން ބުނެފަ އެވެ. މި ބުރުގައި 4،000އަށް ވުރެ ގިނަ ގޯތި ދޫކުރާނެ ކަމަށް މިނިސްޓްރީން ކުރިން ބުނެފައިވެ އެވެ.
ސަރުކާރުން މިހާތަނަށް މި ފޯމުތަކަށް އިވެލުއޭޝަން މަސައްކަތް ނިމޭނެ ތާރީހެއް ހަމަކޮށްފައި ނުވެއެވެ. ނަމަވެސް ބިންވެރިޔާ އަދި ގެދޮރުވެރިޔާ ސްކީމުގެ ފުރަތަމަ ފިޔަވަހީގެ ބިންތައް އަދި ފްލެޓްތައް ސަރުކާރު ނޮވެމްބަރު 17 ގައި ބަދަލު ވުމުގެ ކުރިން ހަވާލު ކުރާނެ ކަމަށް ވަނީ ހާމަކޮށްފައެވެ.
މިގޮތުން މިހާރުވެސް ބިމުގެ ރެޖިސްޓްރީ ހަވާލު ކުރުމުގެ މަސައްކަތް ކުރިއަށްދާއިރު، ފްލެޓްތައް ލިބޭ މީހުންގެ ފައިނަލް ލިސްޓް މިހާރު ވަނީ އާންމުކޮށްފައެވެ. އަދި ފްލެޓްތައް ނިންމުގެ މަސައްކަތް ފަހި ދިރިއުޅުން ކޯޕަރޭޝަންގެ ބެލުުމުގެ ދަށުން ބާރަށް ކުރިއަށްދެއެވެ.