މި އަހަރު ބޭއްވި ރިޔާސީ އިންތިހާބުގައި ވާދަކުރެއްވި ކެންޑިޑޭޓުންގެ މާލީ ބަޔާން އާންމުކޮށް ފެންނާނެހެން އާންމުކުރާނެ ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
ޖުމްލަ 8 ކެންޑިޑޭޓަކީ އެކީ އިންތިހާބުގެ ފުރަތަމަ ބުރު ބޭއްވީ މިދިޔަ މަހުގެ 9 ގަ އެވެ. އަދި ދެވަނަ ބުރު މިދިޔަ މަހުގެ 30 ގައި ބޭއްވި ދެ ކެންޑިޑޭޓަކާ އެކީގަ އެވެ. އިންތިހާބު ކާމިޔާބުކުރެއްވީ ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ.
ރިޔާސީ އިންތިޚާބު 2023 ގެ ކެންޑިޑޭޓުން، އިންތިޚާބާ ގުޅޭ މާލީ ކަންކަމާ ބެހޭގޮތުން ކޮށްފައިވާ އެންމެހައި މުޢާމަލާތްތައް ރިޔާސީ އިންތިޚާބުގެ ޤާނޫނުގައި ބުނެފައިވާ އެ ކެންޑިޑޭޓެއްގެ ރަސްމީ އިންތިޚާބީ އޮޑިޓަރު، އޮޑިޓް ކުރުމަށްފަހު، އެ އޮޑިޓް ރިޕޯޓު އެ އިންތިޚާބު ބާއްވާ ތާރީޚުން…
— Ismail Habeeb (@IsmailHabeeb) October 24, 2023
އީސީގެ ނައިބު ރައީސް އިސްމާއީލް ހަބީބު ވިދާޅުވީ ކެންޑިޑޭޓުން، އިންތިހާބާ ގުޅޭ މާލީ ކަންކަމާ ބެހޭ ގޮތުން ކޮށްފައިވާ ހުރިހާ މުޢާމަލާތްތައް އާންމު ކުރާނެ ކަމަށެވެ.
އޭނަ ފާހަގަކުރެއްވި ގޮތުގައި ރިޔާސީ އިންތިޚާބުގެ ޤާނޫނުގައި ބުނެފައިވާ ގޮތުން އެ ކެންޑިޑޭޓެއްގެ ރަސްމީ އިންތިޚާބީ އޮޑިޓަރު، އޮޑިޓް ކުރުމަށް ފަހު، އެ އޮޑިޓް ރިޕޯޓއެ އިންތިޚާބު ބާއްވާ ތާރީޚުން ފެށިގެން ގިނަވެގެން 60 ދުވަހުގެ ތެރޭގައި، އީސީ އަށް ހުށަހަޅަން ޖެހެ އެވެ.
އެގޮތުން ހުށަހަޅާ އޮޑިޓް ރިޕޯޓުތައް އީސީގެ ވެބްސައިޓްގައި ޝާއިއުކޮށް އެ ރިޕޯޓުތައް ޢާންމުކޮށް ބެލޭނޭ ނިޒާމެއް އިލެކްޝަންސް ހަމަޖައްސާނެ ކަމަށް ހަބީބު ވިދާޅުވި އެވެ.
އިންތިހާބުގެ ފުރަތަމަ ބުރުގައި 8 ކެންޑިޑޭޓުން ވާދަކުރެއްވި އިރު، ތިން ކެންޑިޑޭޓަކު ވާދަކުރެއްވީ އަމިއްލަ ގޮތުންނެވެ. އިންތިހާބީ ރައީސް މުއިއްޒު ހުވާކުރައްވަން ހަމަޖެހިފައި ވަނީ އަންނަ މަހުގެ 17 ގަ އެވެ.