އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބަށް، ދާއިރާތައް ކަނޑައެޅި ގޮތުގެ ރިޕޯޓަށް ޝަކުވާ އާއި ހިޔާލު ހުށަހަޅަން ހުޅުވައިލުމުން އެންނެ ގިނަ ޝަކުވާ ލިބިފައި ވަނީ ފޭދޫ އުތުރު (ފޭދޫ، މަރަދޫފޭދޫ) ދާއިރާ އަށް ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
އެ ކޮމިޝަނުން ބުނީ އަލަށް އިތުރުކުރި ހަ ދާއިރާއާ އެކީ ޝަކުވާތަކަށް ހުޅުވައިލުމުން ޖުމްލަ 65 ޝަކުވާ ލިބުނު ކަމަށެވެ. އިންތިޚާބީ ދާއިރާތައް ކަނޑައަޅާފައިވާ ގޮތުގެ ވަގުތީ ރިޕޯޓް އާންމުކުރީ މިދިޔަ މަހުގެ 27 ގަ އެވެ.
އަލަށް އިތުރުކުރި ހަ ދާއިރާއާ އެކީ އަންނަ އަހަރު ޖުމްލަ 93 މެމްބަރުން އިންތިހާބު ކުރާނެ އެވެ.
* މާލޭ ސިޓީ އަށް 2 ގޮނޑި: ހުޅުމާލެ މެދު ދާއިރާ، ހުޅުމާލެ އުތުރު ދާއިރާ
* އައްޑޫ ސިޓީ އަށް 1 ގޮނޑި: ފޭދޫ އުތުރު ދާއިރާ (ފޭދޫ، މަރަދޫފޭދޫ)
* މާޅޮސްމަޑުލު ދެކުނުބުރިއަށް (ބ. އަތޮޅު) 1 ގޮނޑި: ހިތާދޫ ދާއިރާ (ހިތާދޫ، މާޅޮސް، ދަރަވަންދޫ)
* މާލެ އަތޮޅަށް 1 ގޮނޑި: ހުރާ ދާއިރާ (ހުރާ، ހިންމަފުށި، ގުޅީ)
* ހުވަދުއަތޮޅު އުތުރުބުރިއަށް (ގއ. އަތޮޅު) 1 ގޮނޑި: ކޮލަމާފުށި ދާއިރާ (ކޮލަމާފުށި، ދެއްވަދޫ)
މި ދާއިރާތަކަށް ޝަކުވާ އަށް ހުޅުވައިލުމުން 65 ޝަކުވާ ލިބުނު އިރު އިރު، އޭގެ ތެރެއިން 44 ޝަކުވާއެއް ހުށައަޅާފައިވެއެވެ. ފޭދޫ އުތުރު ދާއިރާ އަށް ހުށަހަޅާފައިވެ އެވެ. އަދި އައްޑޫން ޖުމްލަ 50 ޝަކުވާއެއް ހުށަހެޅި އެވެ.
ޝަކުވާ ހުށައަޅާފައިވާ ދާއިރާތައް:
އައްޑޫ: 7 ދާއިރާއިން- 50 ޝަކުވާ
ލ. އަތޮޅު: 2 ދާއިރާއިން- 3 ޝަކުވާ
ބ. އަތޮޅު: 4 ދާއިރާއިން- 4 ޝަކުވާ
ގއ. އަތޮޅު: 3 ދާއިރާއިން- 6 ޝަކުވާ
މާލެ: 2 ޝަކުވާ
މި ޝަކުވާތަކަށް އީސީން އަންނަ މަހުގެ 5 ގެ ކުރިން ގޮތެއް ނިންމާނެ އެވެ. މަޖިލިސް އިންތިހާބު ބާއްވާނެ ތާރީހެއް ވެސް އީސީން އަންނަ މަހު އިއުލާން ކުރާނެ އެވެ.
އެތަނުން ބުނީ އިންތިޚާބީ ދާއިރާތައް ފައިނަލްވުމުން، އެ ދާއިރާތަކަށް ވޯޓުދިނުމުގެ ހައްގު ލިބިގެންވާ މީހުންގެ ލިސްޓު ތައްޔާރުކޮށް، އެ ލިސްޓު ބޭނުންވާ ފަރާތްތަކަށް ޙިއްސާ ކުރުމަށްޓަކައި، މަޖިލީހުގެ އިންތިޚާބުގައި ވޯޓުދިނުމުގެ ހައްގު ލިބިގެންވާ މީހުންގެ ލިސްޓު ދުރާލައި އާންމު ކުރުމަށް ވެސް މަސައްކަތް ކުރަމުން އަންނަ ކަމަށެވެ.