"ފަހި ފުރުސަތު" ގެ ނަމުގައި މޯލްޑިވްސް ނެޝަނަލް ޔުނިވަސިޓީ (އެމްއެންޔޫ) އިން ބާއްވަމުން އަންނަ ޖޮބް ފެސްޓިވަލްގެ މި އަހަރުގެ ދެވަނަ އެޑިޝަން އަންނަ މަހު ބާއްވަން ނިންމައިފި އެވެ.
ގައުމީ ޔުނިވަސިޓީން ބުނީ ފެސްޓިވަލް ބާއްވަން ހަމަޖެހިފައި ވަނީ އަންނަ މަހުގެ 8 އާއި 9 ގައި ކަމަށެވެ. މިއީ ރާއްޖޭގައި ވަޒީފާ އުފައްދާ ފަރާތްތަކާއި ވަޒީފާ ދޭ ފަރާތްތަކާއި ވަޒީފާގެ ބާޒާރަށް ނުކުންނަން ބޭނުންވާ މީހުންނާއި އެކި ކަހަލަ ފަންނީ ހުނަރުވެރި ދާޢިރާތަކުން ކުރިއަށް ދާން ބޭނުންވާ ފަރާތްތައް ގުޅުވައިދޭ ފެސްޓިވަލެކެވެ.
ވަޒީފާ ދޭ ފަރާތްތަކުން މީގައި ބައިވެރިވާން ރަޖިސްޓްރީވުމުގެ ފުރުސަތު އަންނަ ހޮނިހިރު ދުވަހާ ހަމައަށް ވަނީ ހުޅުވާލައިފަ އެވެ.
އެމްއެންޔޫ އިން ވަނީ މިދިޔަ މެއި މަހު ވެސް ޖޮބް ފެސްޓިވަލެއް ބާއްވައިފަ އެވެ. އެ ފަހަރު ސަރުކާރުގެ މުއައްސަސާތައް ހިމެނޭހެން 40 ފަރާތަކުން ބައިވެރިވި އެވެ.