ފަލަސްތީނާ ދެކޮޅަށް އިޒްރޭލުން ހިންގަމުންލާ ލާއިންސާނީ ޖަރީމާތަކާ ގުޅިގެން "ބޭން އިޒްރޭލު" ގެ ނަމުގައި ރާއްޖޭގައި ޕެޓިޝަނެއް ލޯންޗްކޮށްފި އެވެ.
އަންނަ ހޮނިހިރު ދުވަހި ރަސްމީކޮށް ސޮއިކުރަން ފަށާ މި ޕެޓިޝަނަކީ ރާއްޖޭގެ ސާފިން އެސޯސިއޭޝަނާއި މޯލްޑިވްސް ބޮޑީ ބޯޓިން އެސޯސިއޭޝަންގެ އިތުރުން އިންްޓަނޭޝަނަލް އެއިޑް ކެމްޕޭން (އައިއޭސީ) ގުޅިގެން ލޯންޗްކުރި ޕެޓިޝަނެކެވެ.
ޕެޓިޝަނުގައި ގޮވާލާފައި ވަނީ އެއްވެސް ބޭނުމަކަށް އިސްރާއީލުގެ ޕާސްޕޯޓުގައި ރާއްޖެ އެތެރެވުން މަނާކޮށް ދިނުމަށާއި ރާއްޖޭގައި ރާޅާ އެޅުމުގައި އުޅޭ ދިވެހިންނަށް އިސްރާއީލު ޓޫރިސްޓުންގެ ފަރާތުން ލިބޭ ޖިސްމާނީ އަނިޔާތަކާއި ބިރުދެ އްކުންތައް ކަމާބެހޭ ފަރާތްތަކުން ބަލައި ފިޔަވަޅު އަޅައިދިނުމުގެ އިތުުރަށް ސާފިން ކޮމިއުނިޓީ އަށް އިސްރާއީލުގެ ޓޫރިސްޓުންގެ ފަރާތުން ކުރިމަތިވާ އެ ބާވަތުގެ މައްސަލަތައް ކުށްވެރިކޮށް އެކަންކަން ހުއްޓުވައި ދިނުމަށެވެ.
ރާއްޖޭގެ އެކި ފަރާތްތަކުން އިޒްރޭލު މީހުން ރާއްޖެ އައުން ހުއްޓުވައި ދޭން ގޮވާލާފައިވާ އިރު، އިޒްރޭލު ސަރުކާރުން ވަނީ އެ ތަނުގެ މީހުން ރާއްޖެ ނުދާން މިދިޔަ މަހުގެ ފަހުކޮޅު އަންގައިފަ އެވެ.
މި މަހުގެ 7 ގައި ހަމާސް ޖަމާއަތުން އިޒްރޭލަށް ދިން ވަރުގަދަ ހަމަލާތަކާ ގުޅިގެން އިޒްރޭލުން ވަނީ ފަލަސްތީނާ ދެކޮޅަށް ހަނގުރާމަ އިއުލާންކޮށް، ލާއިންސާނީ އެތައް ޖަރީމާއެއް ހިންގަމުންނެވެ. އަނިޔާވެރި ޔަހޫދީންގެ ހަމަލާތަަކުގައި މިހާތަނަށް ފަލަސްތީނުގެ 5،000 އަށް ވުރެ ގިނަ މީހުން ޝަހީދުވެފައިވެ އެވެ. މީގެ ތެރޭގައި ގިނައީ ކުޑަކުދިންނާއި އަންހެނުންނެވެ.