އިންތިހާބީ ރައީސް އޮފީހުގެ އިންތިޤާލީ ކޮމެޓީތަކުން 77 އިދާރާއަކަށް ޒިޔާރަތްކޮށްފައިވާ ކަމަށާއި، ބައެއް ތަންތަނުގެ ހާއްސަ އޮޑިޓެއް ހަދަން ޖެހޭ ކަމަށް އިންތިހާބީ ރައީސްގެ އޮފީހުން ހާމަކޮށްފިއެވެ.
އިންތިހާބީ ރައީސް އޮފީހުގެ ތަރުޖަމާނު ފިރުޒުލް އަބްދުﷲ ޙަލީލް ވިދާޅުވީ، މިމަހުގެ 4 ވަނަ ދުވަހު ޑީޖީ އޮފް ޓްރާންސިޝަން އައްޔަން ވުމާއެކު އިންތިޤާލީ ކޮމެޓީތަކުގެ މަސައްކަތް ބާރަށް ފެށިގެން ކުރިއަށް ދިޔަ ކަމަށެވެ. އެގޮތުން 21 ދުވަހުގެ ތެރޭ ސަރުކާރުގެ 77 އިދާރާއަކަށް ޒިޔާރަތްކޮށްފައިވާ ކަމަށް ވިދާޅުވިއެވެ. މީގެ ތެރޭގައި ސަރުކާރު ހިއްސާވާ ކުންފުނިތަކާއި، ވުޒާރާތަކާއި އަދި އިދާރާތައް ހިމެނޭ ކަމަށް ވިދާޅުވިއެވެ.
މި އިދާރާތަކަށް ޒިޔާރަތްކޮށް މިހާރު އެތަންތަނުގެ ހާލަތު ދެނެގަނެވިފައިވާ ކަމާށާއި، އެ ހާލަތައް ރިއާޔަތްކޮށް އިންތިޤާލީ 15 ކޮމެޓީން 77 ރިޕޯޓެއް ތައްޔާރު ކުރާނެ ކަމަަށް ވިދާޅުވިއެވެ. އަދި މި ރިޕޯޓުތަކަށް ބިނާކޮށް މިހާރު ކުރެވެމުންދާ މަސައްކަތްތަކަކީ އައު ސަރުކާރު ފަށައިގަންނައިރު ބައެއް ސިޔާސަތުތައް ކަނޑައެޅުން ކަމަށް ފިރުޒުލް ވިދާޅުވިއެވެ.
ފިރުޒުލްގެ ވާހަކައިގައި، އިންތިޤާލީ ކޮމެޓީތަކުން ކުރެއްވި މަސައްކަތުން ބައެއް ކަންކަން ފާހަގަވެފައިވާ ކަން ހާމަކުރެއްވިއެވެ. އެގޮތުން ބައެއް އިދާރާތަކުގެ އޮޑިޓެއް ހަދަން ޖެހޭ ކަމަށްވެސް ވިދާޅުވިއެވެ.
" މިހާތަނަށް އައިއިރު އަޅުގަނޑުމެންނަށް ފާހަގަވެފައި އެބަހުރި ހާއްސަ އޮޑިޓްތަކެއް ހަދަން ޖެހޭ އިދަރާތަކާއި، ކުންފުނިތަކެއް ނުވަތަ މުޢައްސަސާތަކެއް. އަޅުގަނޑުމެން ގަސްތު ކުރަނީ އޮޑިޓަރ ޖެނެރަލްއަށް މި އިދާރާތަކުގެ ހާއްސަ އޮޑިޓެއް ހެދުމަށް ދެންނެވުމަށް. " ފިރުޒުލް ވިދާޅުވިއެވެ.
ފިރުޒުލް މިއީ ކޮން އިދާރާތަކެއްކަން ހާމަކޮށްފައި ނުވެއެވެ. ނަމަވެސް އިންތިޤާލީ ކޮމެޓީތަކުގެ މަސައްކަތަކީ އެއްވެސް ހާލެއްގައި ތަނެއް އޮޑިޓެއް ކުރުމެއް ނޫން ކަމަށާއި، އެތަނުގެ ހާލަތުގެ ސްނެޕް ޝޮޓެއް ނުވަތަ ހާލަތު ހުރި ނެތްގޮތުގެ ފުރިހަމަ މަންޒަރު ބަލާލުން ކަމަށް އޭނާ ވިދާޅުވިއެވެ. އެހެން ކަމުން ފާހަގަ ކުރެވޭ ތަންތަން އޮޑިޓް ކުރުމަށް ހުށަހަޅަނީ ކަމަށް އޭނާ ސާފު ކޮށްދެއްވިއެވެ.
އިންތިޤާލީ ކޮމެޓީތަކުގެ މަސައްކަތް މިހާރު ނިމި ރިޕޯޓުތައް ތައްޔާރު ކުރުމަށް ދާއިރު، ކުރިއަށް އޮތް ދުވަސްތަކުގެ ތެރޭގައި ސަރުކާރުގެ ފުރަތަމަ 100 ދުވަހުގެ ޕްލޭންތަކާއި އަދި ސިޔާސަތުތައް އެ އޮފީހުން ހާމަ ކުރާނެ ކަމަށް ބެލެވެއެވެ.