ކުރިއަށް އޮތް 6 މަސް ދުވަހުގެ ތެރޭ ޖާހުގެ "ދަ ގާޑެންސް" ފްލެޓްތަކުގެ މަސައްކަތް ނިންމާނެ ކަމަށް އެ މަސައްކަތާއި މިހާރު ހަވާލުވެފައިވާ އާބަންކޯއިން ބުނެފިއެވެ.
އާބަންކޯއިން މިމަސައްކަތާއި ހަވާލުވީ، މިދިޔަ ޖުލައި މަހުގެ ތެރޭގައެވެ. އެކި ފަހަރު މަތިން ޖާހު އިންވެސްޓްމެންޓަށް މަސައްކަތް ނިންމުމަށް ފުރުސަތު ދިން ނަމަވެސް، މަސައްކަތް ކުރިއަށް ގޮސްފައި ނުވެއެވެ. އެހެން ކަމުން އާބަންކޯއިން މަސައްކަތާއި ހަވާލުވީ ގަތް ފަރާތްތަކަށް ގެއްލުން ކުޑަކޮށް އަވަހަށް ފްލެޓުަތައް ނިންމުމަށެވެ.
އެގޮތުން ހުޅުމާލޭގެ ޕްލޮޓް ތަރައްޤީ ކުރަމުން އަންނަ ދަ ގާރޑްންސްގެ ގެ މަސައްކަތުގެ ތެރެއިން މިހާރު ކުރިއަށްދާ މަސައްކަތުގެ ތެރޭގައި، 10 ވަނަ ފަންގިފިލާއިން ތިރީ ފަންގިފިލާތަކުގެ ފިނިޝިންގ މަސައްކަތްތައް ހިމެނެއެވެ. އޭގެތެރޭގައި ޕްލާސްޓަރިންގ،ޕުޓީގެ މަސައްކަތް، މުށި އަދި ސީލިންގ ކުރުމުގެ މަސައްކަތް ދަނީ ހިންގަމުންނެވެ.
އާބަންކޯއިން ބުނެފައިވަނީ މިމަސައްކަތް ކުރިއަށް އޮތް ހަ މަސް ދުވަހުގެ ތެރޭގައި ނިންމުމަށް ހަމަޖެހިފައިވާ ކަމަށެވެ. އަދި މިހާރު މަސައްކަތް ޢަމަލީ މަސައްކަތް ފަށާފައިވާ ކަމަށް އެކުންފުނިން ހާމަކުރެއެވެ.
އާބަންކޯއިން މިގޮތަށް ނިންމިއިރު، މި ފްލެޓްތައް ފިނިޝިން މަސައްކަތް ކުރުމަށް ފައިސާ ޙަރަދު ކުރާނީ އެކުންފުނިން އަމިއްލައަށްތޯ ނޫނީ އެހެން ގޮތަކަށްތޯ ހާމަކޮށްފައި ނުވެއެވެ.
މިއީ 2017 ވަނަ ހެދުމަށް ޖާހް އާއި ހަވާލުކުރެވުނު މަސައްކަތެކެވެ. އެތަނުގައި 83 އެޕާޓްމެންޓް ހަދާއިރު 3 ކޮޓަރީގެ އެޕާޓްމެންޓް އަދި ދެ ކޮޓަރީގެ އެޕާޓްމެންޓްތައް ހިމެނެއެވެ. މި ފްލެޓްތައް ނުނިމި ދިގުލައިގެން ދާތީ، ފްލެޓްތައް ގަތް ފަރާތްތައް ކަނބޮޑުވުން ފާޅުކޮށް ވަނީ މުޒާހަރާވެސް ކޮށްފައެވެ.