ބޮލުގައި ނުރަ ޖަހާތީ ކަންބޮޑުވާ މީހުން ގައިމުވެސް މަދެއް ނޫނެވެ. އެހެންވެ ނުރަ ފޮރުވަން ތަފާތު އެކި ކަހަލަ ކަންކަން ކުރެވެ އެވެ. އޭގެ ތެރޭގައި ބޯ ކަޅުކުރަން ތަފާތު އެކި ބްރޭންޑްތަކުގެ ކުލަ ބޭނުންލުރުމާއި ބޮލުގައި ހީނާފަތް އެޅުން ފަދަ ކަންކަން އާންމެވެ.
މިހާރު ބޯ ކަޅުކުރާ ޝެމްޕޫ ވެސް ލިބެން ހުންނާތީ އެއީ ވެސް ނުރައިން ސަލާމަތްވާން ގިނަ ބަޔަކު ބޭނުން ކުރާ އެއްޗެކެވެ. އެކަމަކު މިފަދަ ގިނަ އުފެއްދުންތަކަކީ ޖީބަށް އެހާ ލުއި އުފެއްދުންތަކެއް ނޫނެވެ. އަނެއްކޮޅުން މިފަދަ އުފެއްދުންތައް ތައްޔާރުކޮށްފައި ހުންނަނީ ތަފާތު އެކި ބާވަތުގެ ކެމިކަލްތައް ވެސް ބޭނުންކޮށްގެން ކަމަށްވާތީ، ބޯ ކަޅުކުރަން ހަދައިގެން ލިބޭ އެހެން ގެއްލުންތައް ވެސް ކުޑައެއް ނޫނެވެ.
އެހެންވެ މިހާރު މިއޮތީ އަމިއްލަ އަށް މިކަން ކުރެވިދާނެ ވަރަށް ފަސޭހަ، އަދި އެހާމެ ހަރަދު ވެސް ކުޑަ ގޮތެކެވެ. މިކަމަށް ބޭނުން ވަނީ އެންމެ ދެ ބާވަތެކެވެ. އެއީ ލުނބޮ އާއި ކާށިތެލެވެ. ހަދަން ޖެހޭ ގޮތަކީ އާންމުކޮށް ބާޒާރުގައި ވިއްކަން މި ހުންނަ ޒާތުގެ ލުނބޮ އިން އިސްތަށިގަނޑަށް ވާ ވަރަށް ހުތް ފެލާފައި ކޮންމެ ލުނބޮއަކަށް ހަތަރު ސައިސަމުސާގެ މަގުން ކާށިތެޔޮ އަޅާފައި ރަނގަޅަށް އެއްކޮށްލާނީ އެވެ.
ފަސޭހަކޮށް ބޭނުން ކުރެވޭ ގޮތަށް ސްޕްރޭ ކުރެވޭ ކަހަލަ ފުޅިއަކަށް މި އަޅާފައި ބަހައްޓާށެވެ. ބޮލަށް ސްޕްރޭކުރާނީ ހަފުތާ އަކު ދެ ދެ ދުވަހު އެވެ. ސްޕްރޭކޮށްފައި ގަޑިއެއްހާ އިރު ބަހައްޓާފައި ދޮވެލާނީ އެވެ.
ގަވައިދުން ހަފުތާ އަކު ދެ ދުވަހު މި ބޭނުން ކުރަން ފެށުމުން އިސްތަށިގަނޑުން ބަދަލުތަކެއް ފެންނަން ފަށާނެ އެވެ. އެގޮތުން ނުރަ އިސްތަށިތައް ކަޅުވުމުގެ އިތުރަށް އިސްތަށިތަކުގެ ސިއްހަތަށް ވެސް އެދެވޭ ހެޔޮ ބަދަލެއް އަންނަކަން ފާހަގަކުރެވޭނެ އެވެ.
ނިކަން ވާ ގޮތެއް ބަލާލަން ތަޖުރިބާކޮށްލުން ކިހިނެއް ވާނެ ހެއްޔެވެ؟