ވިނަރެސް މަޝްރޫޢުގެ ދަށުން ނުވިކި ބާކީވާ ފްލެޓުތަކަށް ގަތުމަށް އަލުން ކުރިމަތިލުމުގެ ފުރުސަތު ހުޅުވާލަން އާބަންކޯއިން ނިންމައިފިއެވެ.
އާބަންކޯއިން ވިނަރެސްގެ ބާކީ ފްލެޓުތައް ގަތުމަށް، ހުޅުވާލާނީ އަންނަ ނޮވެމްބަރު މަހުގެ 5 ވަނަ ދުވަހު އެވެ. މި ފްލެޓުތައް ގަތުމަށް ޝަޢުޤުވެރިވާ ފަރާތްތަކުން އެކުންފުނީގެ އޮންލައިން ޕޯޓަލްއިން ހައުސިންގް ޙިޔާރުކުރުމަށް ފަހު ފޯމު ފުރާލަންވީއެވެ. ވިނަރެސް ފްލެޓަށް އަލުން ކުރިމަތިލުމުގެ ފުރުސަތު ހުޅުވާލަން ނިންމާފައިވަނީ މިހާރު ކުރިއަށްދާ މަރުހަލާތަކަށް ފަހު، ބައެއް ފްލެޓުތައް ބާކީވާނެ ކަމަށް ބެލެވޭތިއެވެ.
އެގޮތުން މިދިޔަ އަހަރު ސެޕްޓެމްބަރު މަހު 15 ވަނަ ދުވަހުގެ ނިޔަލަށް ފްލެޓުތަކަށް ކުރިމަތިލުމަށް ހުޅުވާލި ފުރުސަތުގައި ހުރިހާ މަރުހަލާތަކެއް ފުރިހަމަކޮށް ފްލެޓު އިހްތިޔާރު ކުރުމަށް ދިން ފުރުސަތުގެ ބޭނުން ނުކުރާ ފަރާތްތަކާއި އެޕްލިކޭޝަން ދޫކޮށްލުމަށް އެދިފައިވާ ފަރާތްތައް މީގެ ތެރޭގައި ހިމެނެއެވެ. މީގެ އިތުރުން މަރުހަލާތައް ފުރިހަމަކޮށް މާލީ ޤާބިލުކަން ފުރިހަމަ ނުވާ ފަރާތްތަކުގެ ފޯމުތައްވެސް ބާތިލްކޮށް ބައެއް ފްލެޓުތައް ބާކީވާނެ ކަމަށް އާބަންކޯއިން ޤަބޫލު ކުރެއެވެ.
ވިނަރެސް މަޝްރޫއިން ފުލެޓް ގަތުމަށް އެދި ފޯމު ހުށަހޭޅުމަށް ހުޅުވާލުމާ ގުޅޭ
ލިންކު: https://t.co/r861Of7McN pic.twitter.com/gO8WGnRyTY
— Urbanco (@hdcmaldives) October 26, 2023
އާބަންކޯއިން ބުނީ މިހާރު ކުރިއަށްދާ މަރުހަލާ މިމަހުގެ ނިޔަލަށް ނިމޭނެ ކަމަށެވެ. އޭރުން ބާކީވާ ފްލެޓުތައް ދެނެގަނެވޭނެ ކަމަށް އެކުންފުނިން ފާހަގަ ކުރެއެވެ.
މިކަމާއި ގުޅޭ އެންމެހައި މައުލޫމާތު އާބަންކޯގެ ވެބްސައިޓު އަދި ހޮޓްލައިން 1516 އިން ލިބިވަޑައިގަންނަވާނެ ކަަމަށް އެކުންފުނިން ބުނެއެވެ.
ވިނަރެސް ފްލެޓްތަކަކީ ހުޅުމާލޭގެ ފޭސް ދޭއްގައި 13 ބުރީގެ 10 ޓަވަރުގައި ތިން ކޮޓަރީގެ 1،340 އެޕާޓްމެންޓް ހުންނަ ފްލެޓްތަކެވެ. ބޯހިޔާވަހިކަމުގެ މި މަޝްރޫ އަކީ މެދުފަންތީގެ ރައްޔިތުންނަށް ހާއްސަކޮށްގެން ކުރީގެ ރައީސް އަބްދުﷲ ޔާމީންގެ ވެރިކަމުގައި ފެށި މަޝްރޫއެކެވެ.