އީއްޔެ ވަނީ އައްޑޫގެ ފަތުރުވެރިކަމުގެ މަޝްރޫޢުތަކުގެ ތެރެއިން މުހިންމު ސިޓީ ކައުންސިލުގެ އެންމެ އުއްމީދީ އެއް ޕްރޮޖެކްޓް ކަމުގައިވާ އައްޑޫ ސިޓީ ފޭދޫ ޔޮޓް-މެރީނާ އަދި ކްރޫޒް ޓާމިނަލާއި އެކު 100 އެނދު ސިޓީ ހޮޓަލުގެ މަސައްކަތް ހަވާލުކޮށްފައެވެ.
މިމަޝްޜޫއު ހަވާލުކޮށްފައިވަނީ އިންޓަނޭޝަނަލް ޗެއިން މޯލްޑިވްސް ޕްރައިވެޓް ލިމިޓެޑް (އައިސީއެމްޕީއެލް) ކިޔާ ކުންފުންޏަކާ އެވެ. މިމަޝްރޫޢުގެ ދަށުން ފޭދޫގެ، ގަމާއިި ވީ ފަޅިން ކުރީގެ ފުޓުބޯޅަ ދަނޑުގައި 100 އެނދުގެ ހޮޓަލަކާއި، ކްރޫޒް ޓާމިނަލަކާއި އަދި ޔޮޓް މެރިނާއެއް ޤާއިމް ކުރާނެއެވެ. އެއްބަސްވުމުގައި އެ ކުންފުންޏާއި އެކު ސޮއިކޮށްފައިވާއިރު، މި މަޝްރޫޢުގެ ތެރެއިން މިހާރު ގަމާއި ފޭދޫ ގުޅޭ ކޯޒްވޭ ވެސް ފުޅާ ކުރުމަށް ރޭވިފައިވާ ކަމަށް ސިޓީ ކައުންސިލުން ބުނެއެވެ.
މިމަޝްރޫޢު އަކީ މުޅި ޖުމްލަ 350 މިލިއަން ޑޮލަރުގެ އަގު ހުރި އިންވެސްޓްމެންޓް މަޝްރޫޢުއެއް ކަމަށް އައްޑޫސިޓީ ކައުންސިލުން ބުނެއެވެ. އަދި މަޝްރޫޢު ނިންމުމަށް ދީފައިވަނީ 2 އަހަރު ދުވަސް ކަމަށްވެސް ސިޓީ ކައުންސިލުން ބުނެއެވެ. ސިޓީ ކައުންސިލުން ބުނީ، ފުރަތަމަ މަރުހަލާ އަކީ ސާވޭ އަދި ޑިޒައިން މަސައްކަތް ކަމަށާއި އުއްމީދަކީ ދާދި އަވަހަށް ފެށިގެން ދިއުން ކަމަށެވެ.
މިވަރުގެ ބޮޑު އިންވެސްޓްމެންޓް މަޝްރޫޢެއް ކުރިއަށް ގެންދަން ނިންމުމާއި ގުޅޭގޮތުން މޭޔަރ އަލީ ނިޒާރު ވިދާޅުވީ، އެއްބަސްވުމުގެ ތެރެއިން ފުރަތަމަ މަރުހަލާތެރޭ ޓައިމްލައިން ކައުންސިލަށް އެ ފަރާތުން ދޭނެ ކަމަށެވެ. އޭރުން މަސައްކަތް ކުރިއަށް ދާނެ ގޮތް އެނގިގެންދާނެ ކަމަށް ވިދާޅުވިއެވެ.
" މިއީވެސް ވަރަށް ތަފާތު މަޝްރޫޢުއެއް، ހަންކެޑެ އަކީވެސް ހަމަ އެގޮތަށް ތަފާތު މަޝްރޫޢުއެއް. މި ހުރިހާ މަޝްރޫޢުތައް ނިމިގެންދާއިރު އައްޑޫގެ އިޤްތިޞާދަށް ބޮޑު ބަދަލެއް އަންނާނެ ކަމަށް ބެލެވޭ. އުއްމީދަކީ މި ހުރިހާ ކަމެއް ނިމިގެން ދިއުން " ނިޒާރު ވިދާޅުވިއެވެ.
އައްޑޫސިޓީ ކައުންސިލުން އެ ކުންފުންޏާއި މިމަސައްކަތައް ހަވާލުކޮށްފައިވާއިރު، 28،328.41 އަކަ މީޓަރުގެ ސަރަހައްދެއް އެކުންފުންޏާއި ވަނީ ހަވާލުކޮށްފައެވެ. އައްޑޫގައި ޔޮޓް މެރީނާއަކާއި ކްރޫޒް ޓާމިނަލަން ހަދަން ނިންމާ އެވާހަކަ ދައްކަމުން އަންނަނީ 2021 އިން ފެށިގެންނެވެ. މި ފެސިލިޓީތައް ގާއިމުކުރަން ހަމަޖެހިފައި ވަނީ ފޭދޫގެ ކުރީގެ ރަސްމީ ބޯޅަދަނޑާއި އެ ސަރަހައްދުގަ އެވެ. މި ސަރަހައްދަކީ މިހާރު ވެސް ޔޮޓްތައް ކޮންމެވެސް ވަރަކަށް ކައިރީ ކުރާ ސަރަހައްދެކެވެ.