އާސަންދަ އިން ފޮނުވާ އޯޓީޕީ ނަމްބަރު ދިނުމުން ނޫނީ ބޭސް ފިހާރަތަކުން ބޭސް ނުނެގޭ ގޭތަށް ހަދައިފި އެވެ.
ސަރުކާރުގެ ހެލްތު އިންޝުއަރެންސް ކުންފުނިން ބުނީ މި ބަދަލިު އެންމެ ފުރަތަމަ ގެނައި މާލޭގެ ބޭސް ފިހާރަތަކަށް ކަމަށެވެ. އެގޮތުން ބޭސް ނަގަން ދާ މީހާގެ އައިޑީކާޑު ނަމްބަރާއި ފޯނު ނަމްބަރުގެ ތަފްސީލު ހޯދައި، ފޯނަށް އަންނަ އޯޓީޕީ ނަމްބަރު ދިނުމުން ނޫނީ ޓްރާންސެކްޝަން ފުރިހަމަ ނުވާ ގޮތަށް ވަނީ ހަމަޖައްސައިފަ އެވެ.
އާސަންދަ ކުންފުނިން މި ގޮތަށް ހަމަޖެއްސީ ބައެއް ކަސްޓަމަރުންނަށް ނޭނގި އެ މީހުންގެ އާސަންދަ ބޭނުންކޮށްގެން ފާމަސީތަކުން ޚިދުމަތް ހޯދާކަމުގެ ޝަކުވާ ލިބެމުންދާތީ ކަމަށެވެ. އެހެންވެ މި ބަދަލު ކުރިއަށް އޮތް ތަނުގައި ރާއްޖޭގެ ހުރިހާ ބޭސް ފިހާރައަކަށް ތަޢާރަފްކުރުމަށް ވަނީ ނިންމައިފަ އެވެ.
ރާއްޖޭގައި 400 އަށް ވުރެ ގިނަ ފާމަސީތަކަށް އާސަންދައިގެ ހުއްދަ ދީފަ އެވެ.