ހުރިހާ ގައުމަކާ އެކީ ވެސް ގާތް ގުޅުމެއް ބާއްވާނެ ކަމަށާއި އަދި އަބަދު ވެސް "ޕްރޯ" ވާނީ ރާއްޖެ ކަމަށް އިންތިހާބީ ރައީސް ޑރ. މުއިއްޒު ވިދާޅުވެއްޖެ އެވެ.
ބްލޫމްބާގް ޓީވީ އަށް ދިން އިންޓަވިއުއެއްގައި އަންނަ މަހުގެ 17 ގައި ހުވާކުރައްވަން ހަމަޖެހިފައިވާ އާ ރައީސް ވިދާޅުވީ އެ މަނިކުފާނުގެ ސަރުކާރުގައި ވަކި ގައުމެއް ހާއްސަ ނުވާނެ ކަމަށެވެ. އެގޮތުން ހުރިހާ ގައުމަކާ އެކީ ވެސް ހަމަހަމަ ގުޅުންތަކެއް ބާއްވާނެ ކަމަށާއި އެ ގުޅުންތަކުގައި އެންމެ އިސްކަން ދޭނީ ރާއްޖޭގެ މަސްލަހަތަށް ކަމަށް ވިދާޅުވި އެވެ.
މުއިއްޒު އިންތިހާބު ކާމިިޔާބު ކުރެއްވުމާ ގުޅިގެން ބޭރުގެ ބައެއް މީޑިއާތަކުން މުއިއްޒުގެ ސަރުކާރު ވަނީ "ޕްރޯ ޗައިނާ" ނުވަތަ ޗައިނާއާ މާ ގާތް ގުޅުމެއް ބާއްވާނެ ސަރުކާރަކަށް ވާނެ ކަމަށް ބުނާތީ އިންތިހާބީ ރައީސް ވިދާޅުވީ އެއީ ރަނގަޅު ވާހަކައެއް ނޫން ކަމަށެވެ.
President-elect Mohamed Muizzu says he intends to work closely with all countries. Maldives is too small to take sides in a “geopolitical rivalry between bigger nations,” he says https://t.co/nT5YTWiNej pic.twitter.com/6DuEyzyddS
— Bloomberg TV (@BloombergTV) October 27, 2023
"ޕްރޯ ޗައިނާ މީހެއްގެ ގޮތުގައި ލޭބަލްވެފައި އޮތް ނަމަވެސް އަޅުގަނޑު ޕްރޯ ޗައިނާއެއް ނޫން، ރާއްޖެ އިން ހުރިހާ ގައުމަކާ އެކީ ވެސް ގާތްކޮށް މަސައްކަތް ކުރާނެ،" ކުރީގެ ހައުސިން މިނިސްޓަރު ވިދާޅުވި އެވެ. "ރާއްޖެ އަކީ ކުޑަ ގައުމެއް، ރާއްޖެއިން ބޭނުމެއް ނުވޭ. ދުނިޔޭގެ ބޮޑެތި ގައުމުތަކުގެ ކޯޅުންގަނޑުގެތެރެއަށް ވަންނާކަށް."
މުއިއްޒުގެ ސަރުކާރު "ޕްރޯ ޗައިނާ" ގެ ސަރުކާރަށް ވެދާނެ ކަމަށް ސިފަކުރާ މައިގަނޑު ސަބަބަކީ އެ މަނިކުފާނު ނިސްބަތްވާ ޕީޕީއެމް/ޕީއެންސީން ކުރިން ރާއްޖޭގައި ވެރިކަން ކުރި އިރު، ސިޔާސީ ގޮތުން އެންމެ ގާތް ގުޅުމެއް ބޭއްވީ ޗައިނާއާ ކަމަށްވާތީ އެވެ. އެގޮތުން އޭރު ރައީސް އަބްދުﷲ ޔާމީންގެ ސަރުކާރުގައި ހިންގި އެންމެ ބޮޑު އެއް މަޝްރޫއު ކަމަށްވާ ސިނަމާލެ ބްރިޖަކީ ޗައިނާއާ ހަވާލުކޮށްގެން ހިންގި މަޝްރޫއެކެވެ.
ބްލޫމްބާގް ޓީވީ އިންޓަވިއުގައި މުއިއްޒު ވަނީ ރާއްޖޭގައި އިންޑިއާ ސިފައިން ތިބޭތީ އެކަމާ ގުޅޭ ގޮތުން ދެކެވަޑައިގަންނަވާ ގޮތް ވެސް ތަކުރާރު ކުރައްވައިފަ އެވެ. އެގޮތުން އެއްވެސް ގައުމެއްގެ ސިފައިންތަކެއް ރާއްޖޭގައި ތިބެން ބޭނުން ނުވާ ކަމަށާއި ރާއްޖެ އަކީ ފުރިހަމަ، މިނިވަން، މުސްތަގިއްލު ގައުމެއް ކަމަށް ވިދާޅުވި އެވެ.
އެހެންވެ ވެރިކަމާ ހަވާލުވެވަޑައިގަތުނަށް ފަހު ވަރަށް އަވަހަށް ރާއްޖޭގައި ތިބި އިންޑިއާ ސިފައިން ފޮނުއްވައިލައްވާނެ ކަމަށް ވިދާޅުވި އެވެ. މުއިއްޒު ވިދާޅުވީ އެކަމާ ގުޅޭ މަޝްވަރާތައް މިހާރު ވެސް ކުރިއަށްދާ ކަމަށެވެ.