މުދަލާއި ހިދުމަތުން ނަގާ ޓެކްސް، ޖީއެސްޓީ ބަޔާން ސުންގަޑި އަށް ހުށަހަޅަން މޯލްޑިވްސް އިންލެންޑް ރެވެނިއު އޮތޯރިޓީ މީރާ) އިން ހަނދާންކޮށް ދީފި އެވެ.
އެތަނުން ބުނީ މިދޔަ މަހާއި މި އަހަރުގެ ތިންވަނަ ކުއާޓަރުގެ ޖީއެސްޓީ ބަޔާން ހުށަހެޅުމުގެ ސުންގަޑި އަކީ މާދަމާ ކަމަށެވެ. އެހެންވެ ސުންގަޑި ހަމަވުމގެ ކުރިން މީރާގައި ޖީއެސްޓީ އަށް ރަޖިސްޓަރީކޮށްފައިވާ ހުރިހާ ފަރާތްތަކުން ވެސް ޖީއެސްޓީ ބަޔާން ހުށަހަޅަންޖެހޭނެ ކަމަށް ބުންޏެވެ.
ދައިލަތުގެ ޓެކްސް އިދާރާ އިން ފާހަގަކޮށްފައިވާ ގޮތުގައި ޖީއެސްޓީއަށް ރަޖިސްޓަރީކޮށްފައިވާ ފަރާތްތަކުގެ ތެރެއިން ސުންގަޑި އަށް ބަޔާން ހުށަހަޅާ މިންވަރު އެންމެ ދަށްކޮށް އުޅެނީ އެންމެ ކުދި މެދު ފަންތީގެ ވިޔަފާރިތަކުންނެވެ. އެހެންވެ ތަކުރާރުކޮށް ސުންގަޑި އަށް ޓެކްސް ބަޔާން ހުށަނާޅާ ނަމަ، އެ ފަރާތްތަކުގެ ޓެކުހާ ގުޅޭ ޖޫރިމަނާ ލުއިކޮށް ދިނުމުގެ ފުރުސަތު ކުޑަވާނެ ކަމަށް މީރާ އިން ބުންޏެވެ.
މީރާ އިން ބުނީ ޖީއެސްޓީ ބަޔާން ހުށަހަޅާ އިރު، ކަނޑައެޅިފައިވާ މުއްދަތުގެ ތެރޭގައި ޕްލާސްޓިކް ކޮތަޅުގެ ފީގެ ގޮތުގައި ނަގައިފައިވާ އަދަދުތައް ވެސް ޓެކްސް ބަޔާނުގައި ހިމަނައި، އެ ފައިސާ މީރާއަށް ދައްކަން ޖެހޭނެ ކަމަށެވެ.
ޖީއެސްޓީ ބަޔާން މީރާގެ އޮންލައިން ޕޯޓަލް "މީރާ ކަނެކްޓް" މެދުވެރިކޮށް ހުށަހަޅައި ފައިސާ ދެއްކޭނެ އެވެ. އަދި މުއްދަތުގެ ތެރޭގައި އެއްވެސް ވިޔަފާރި މުއާމަލާތެއް ހިންގައިފައި ނުވާ ފަރާތްތަކުން "ވާރުޕޭ" މެދުވެރިކޮށް ޖީއެސްޓީ ސުން-ބަޔާން ވެސް ހުށަހެޅޭނެ އެވެ.