ރައްޔިތުންގެ މަޖިލީހުގެ ރައީސްކަމުން މުހައްމަދު ނަޝީދު ވަކިކުރަން އެޖެންޑާކުރި މިއަދުގެ ޖަލްސާ ވެސް ކެންސަލްކޮށްފި އެެވެ.
ޖަލްސާ ނުބޭއްވުނީ އިއްޔެއާ އެއްގޮތަށް މިއަދު ވެސް މަޖިލީހުގެ ނައިބު ރައީސާ އިވާ އަބްދުﷲ އާލާސްކަންފުޅާ އުޅުއްވާތީ އެވެ. ޑެންގޫ އަށް ޕޮޒިޓިވްވެފައިވާތީ އީވާ އޮތީ މަޖިލީހަށް ސަލާން ފޮނުއްވައިފަ އެވެ.
މަޖިލީހުގެ ގަވައިދުގައިވާ ގޮތުން، މަޖިލީހުގެ ރައީސްގެ އިތުބާރު ނެތްކަމުގެ މައްސަލައިގެ ރިޔާސަތު ބަލަހައްޓަވަން ވާނީ މަޖިލީހުގެ ނައިބު ރައީސެވެ.
ނަޝީދު މަގާމުން ވަކިކުރަން އެމްޑީޕީން ހުށަހަޅާފައި އޮތީ 49 މެންބަރުންގެ ސޮޔާ އެކީގަ އެވެ. މި މައްސަލަ މަޖީހުގެ ތެރެއިން ކޮޅެއްގައިި ނުޖެހި ދިގުލައިގެންދާ އިރު، މި މައްސަލަ އެމްޑީޕީން އިއްޔެ ވަނީ ސުޕްރީމް ކޯޓަށް ވެސް ހުށަހަޅައިފަ އެވެ.
ނަޝީދުގެ މައްސަލައިގައި ގޮތެއް ނުނިމޭތީ ގިނަ ބަޔަކު މިހާރު ގެންދަނީ ކަންބޮޑުވުން ފާޅުކުރަމުންނެވެ. ސަބަބަކީ އަންނަ މަހުގެ 17 ގައި އިންތިހާބީ ރައީސް ޑރ. މުހައްމަދު މުއިއްޒު ހުވާކުރައްވަން ހަމަޖެހިފައިވާތީ އެވެ. އެމްޑީޕީން ބުނެފައި ވަނީ ނަޝީދު ރިޔާސަތި ހުންނަވައިގެން މުއިއްޒު ރައީސްކަމުގެ ހުވާކުރައްވައިފި ނަމަ އެ ހުވާ ބަލައިނުގަންނާނެ ކަމަށާއި މުއިއްޒުގެ ކެބިނެޓަށް މަޖިލީހުން ރުހުން ވެސް ނުދޭނެ ކަމަށެވެ.