ސަރުކާރުގެ ޕީއެސްއައިޕީ ބަޖެޓުގެ ތެރެއިން، ށ. މިލަންދޫ އަދި އައްޑޫ ހުޅުދޫގައި މިސްކިތެއް އެޅުމުގެ އެއްބަސްވުމުގައި އިސްލާމިކް މިނިސްޓްރީން ސޮއިކޮށްފި އެވެ.
މިކަމަށްޓަކައި އިސްލާމީ މަރުކަޒުގައި ބޭއްވި ރަސްމިއްޔާތުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީއެވެ. މި މަޝްރޫޢުގެ ކޮންޓްރެކްޓަރ އެލް.އެފް.ކޮންސްޓްރަކްޝަން ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ އަޙްމަދު ފިރާޤެވެ.
މިއަދު ސޮއިކުރެވުނު މި އެއްބަސްވުމުގެ ދަށުން އައްޑޫ ސިޓީ ހުޅުދޫގައި އިމާރާތްކުރަނީ 500 މީހުންގެ ޖާގައިގެ މިސްކިތެކެވެ. މިމަޝްރޫޢު ގެ އަގަކީ 17,488,559.49ރ. އެވެ. ށ. މިލަންދޫގައި އިމާރާތްކުރަނީ 700 މީހުންގެ ޖާގައިގެ މިސްކިތެކެވެ. މިއީ 15,174,897.40ރ. ގެ މަޝްރޫޢުއެކެވެ. މި ދެ މިސްކިތުގެ މަސައްކަތް ނިންމުމަށް ހަވާލުކޮށްފައިވަނީ، އެއް އަހަރު ދުވަހުގެ ތެރޭގައެވެ.
މިރަސްމީއްޔާތުގައި ވާހަކަ ދައްކަވަމުން އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވި، އެއްބަސްވުމުގައިވާ މުއްދަތައް މަޝްރޫޢު ނިންމައި ދެއްވާނެ ކަމަށް އުއްމީދު ކުރައްވާ ކަމަށެވެ. އަދި ރައްޔިތުންގެ މަޖްލީހުގެ މިލަންދޫ ދާއިރާގެ މެންބަރު ޢަލީ ރިޟާ، އެރަށުގައި އިމާރާތްކުރުމަށް ހަމަޖެހިފައިވާ މިސްކިތުގެ ކަންތައް ވަރަށް ގާތުން ބައްލަވައި މަޢުލޫމާތު އޮޅުން ފިލުއްވާކަން މިނިސްޓަރ ފާހަގަކުރެއްވިއެވެ. މި ރަސްމިއްޔާތުގައި މެންބަރު ރިޟާ ވިދާޅުވީ އުންމީދަކީ ވީހާވެސް އަވަހަށް މި މަސައްކަތްފެށިގެން ދިޔުންކަމަށްކަމަށެވެ.
ސަރުކާރުގެ ޕީއެސްއައިޕީ ބަޖެޓުން ޙަރަދުކޮށްގެން ތަރައްޤީ ކުރާ މި ދެމިސްކިތުގައިވެސް ފިރިހެނުންނާއި އަންހެނުންނަށް ނަމާދު ކުރެވޭ ޖާގަ ހުންނާނެ ކަމަށް މިނިސްޓްރީން ބުނެއެވެ.