ދައުލަތުގެ ހަރުމުދަލާއި ވިޔަފާރި މުޢާމަލާތްތައް ހިންގުމުގައި ޤާނޫނީ އިންތަކުން ބޭރު ނުވުމަށް، އިންތިހާބީ ރައީސްގެ އޮފީހުން އިލްތިމާސްކޮށްފިއެވެ.
އެ އޮފީހުން މިއަދު ނެރުނު ނޫސްބަޔާނެއްގައި ބުނީ، ސަރުކާރު ބަދަލުވުމުގެ އިންތިޤާލީ މަރުޙަލާއަކީ އާ ސިޔާސަތުތަކަކަށް ރައްޔިތުން އާނބަސް ބުނެ، އާ ސަރުކާރަކަށް ދައުލަތުގެ ކަންކަން ހަވާލުކުރުމަށް ނިންމި ނިންމުމާ ގުޅިފައިވާ މަރުހަލާއެއް ކަމަށެވެ.
"އަދި މި މަރުޙަލާގެ ރޫޙަކަށްވާންވާނީ ރައްޔިތުން އިންތިޚާބުކޮށްފައިވާ އާ ސަރުކާރުގެ މަސައްކަތްތަކަށް މަގުފަހިވާނެހެން ވެރިކަމުގެ ބާރުތައް ބަދަލުވެގެންދިޔުމެވެ. އަދި އާ ސަރުކާރުން ރައްޔިތުންނަށްޓަކައި ތަންފީޒުކުރުމަށް ރާވާފައިވާ ސިޔާސަތުތަކަށް ފުރުސަތު ލިބޭނެހެން ދައުލަތުގެ ހަރުމުދަލާއި ފައިސާއާއި މާލީ މުޢާމަލާތްތައް، ޤާނޫނީ ހަމަތަކުގެ މަތީން ރައްކާތެރިކުރުމެވެ. " ބަޔާނުގައި ވެއެވެ.
އިންތިހާބީ ރައީސް އޮފީހުން ބުނީ މިފަދަ މުޢަމަލާތްތައް އަވަސް އަރުވާލައިގެން ނިންމުމާއި އަދި މުޅިން އައު މުޢަމާލާތް މި މަރުހަލާގައި ފެށުމަކީ ކޮރަޕްޝަނަށް މަގުފަހިވާނެ ކަމެއްގެ ގޮތުގައި ބެލުމުގެ ފުރުސަތު އޮންނާނެ ކަމަށެވެ. އަދި މިފަދަ މައްސަލަތައް ބަލައި، ޤާނޫނާ ޚިލާފަށް ކޮރަޕްޝަނަށް މަގުފަހިވާ ގޮތަށް ކޮށްފައިވާ ކަންކަމާމެދު ޤާނޫނީ ފިޔަވަޅު އެޅުމުގެ ފުރުސަތު އޮންނާނެ ކަމަށް ވަނީ ބުނެފައެވެ.
މި މަރުޙަލާގައި ދައުލަތުގެ ހަރުމުދަލާއި ފައިސާއާ ގުޅޭގޮތުން ދައުލަތުގެ މުއައްސަސާތަކާއި ސަރުކާރުގެ ކުންފުނިތަކާއެކު ވިޔަފާރީގެ މުޢާމަލާތްތައް ހިންގަވާ ވިޔަފާރިވެރިންނާއި އެންމެހާ ރައްޔިތުން، ޤާނޫނީ އިންތަކުގެ ތެރެއިން އެ ފަދަ މުޢާމަލާތްތަކާ ގުޅޭ ކަންކަން ކުރިޔަށް ގެންދިޔުމަށް ޚާއްސަ ސަމާލުކަމެއް ދިނުމަށް ވަނީ ގޮވާލާފައެވެ.
"ދައުލަތުގެ މުއައްސަސާތަކާއި ސަރުކާރުގެ ކުންފުނިތަކުންވެސް ޤާނޫނާއި ގަވާއިދުތަކާ އެއްގޮތަށް ކަންކަން ކުރުމަށް އެ ފަރާތްތަކަށް ބާރުއަޅުއްވައިދެއްވުން އެދެމެވެ. އަދި މި ފަދަ މުޢާމަލާތްތައް އަވަސްއަރުވާލައިގެން ނިންމުމަށް މަސައްކަތްކުރެއްވުމުގެ ބަދަލުގައި، ރައްޔިތުންގެ ނިންމުމަށާއި އިންތިޤާލީ މި މަރުޙަލާގެ ރޫޙަށް އިޙުތިރާމުކޮށް، ކަމޭހިތުން އިސްކުރުމަށް ހުރިހާ ފަރާތްތަކަށް އިލްތިމާސްކުރަމެވެ. " ބަޔާނުގައި ވެއެވެ.
އިންތިހާބީ ރައީސް އޮފީހުން މިފަދަ ބަޔާނެއް ނެރެފައި މިވަނީ އާބަންކޯއިން ބިންތަކުގެ މުޢަމަލާތް ކުރާކަމަށް ބުނެ ކަންބޮޑުވުން އީއްޔެ ފާޅުކުރުމަށް ފަހުއެވެ. އޭސީސީ ވަނީ މި މަރުހަލާގައި އެ މަސައްކަތް ހުއްޓާލުމަށް އެކުންފުންޏަށް އަންގާފައެވެ.