ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ވަކިކުރުމާ ގުޅޭ ގޮތުން އެމްޑީީން ސުޕްރީމް ކޯޓަށް ހުށަހެޅި މައްސަލަ އެ ކޯޓުން ބަލައިގެންފި އެވެ.
މައްސަލަ ކޯޓަށް ހުށަހެޅީ އިއްޔެ އެވެ.
ނަޝީދުގެ މައްޗަށް އިތުބާރު ނެތް ކަމަށް ނިންމައި މަގާމުން ވަކިކުރަން ރައްޔިތުބންގެ މަޖިލީހަށް ހުށަހަޅާފައި އޮތީ އެމްޑީޕީގެ 49 މެމްބަރުންގެ ސޮޔާ އެކީ އެވެ. އެކަމަކު އެ މައްސަލަ އެޖެންޑާކުރި ދެ ޖަލްސާ ވެސް ފާއިތުވި ދެ ދުވަހު ވަނީ ބޭއްވޭ ގޮތް ނުވެފަ އެވެ. ސަބަބަކީ މަޖިލީހުގެ ނައިބު ރައިސް އަދި ނަޝީދަށް ބޮޑުބޭބެ ވިދާޅުވާ އީވާ އަބްދުﷲ އާލާސްކަންފުޅާ މަޖިލީހަށް ސަލާން ފޮނުއްވާފައިވާތީ އެވެ.
އެމްޑީޕީން ސުޕްރީމް ކޯޓަށް ހުށައެޅި މައްސަލާގައި ވަނީ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ތާވަލުކުރާ ޖަލްސާ އަށް ނައިބު ރައީސަށް ވަޑައިނުގެންނެވޭ ހާލަތުގައި، މަޖިލީހުގެ ގަވައިދުގެ 44 ވަނަ މާއްދާއަށް އަމަލު ކުރަން ޖެހޭ ގޮތަށް މާނަކޮށް ދިނުމަށެވެ. އަދި މަޖިލީހުގެ ރައީސްގެ އިތުބާރު ނެތްކަމުގެ މައްސަލާގައި ގޮތެއް ނިންމުމަށް ފަހު ނޫނީ މަޖިލީހުގެ އެހެން އެއްވެސް މަސައްކަތެއް ކުރިއަށް ނުގެންދެވޭނެ ކަމަށް މާނަކޮށް ދެއްވުމަށް ވެސް އެދިފައިވެ އެވެ.
ނަޝީދު މަގާމުން ވަކިކުރަން އެމްޑީޕީން އޮތީ ތުރީލައިން ވިޕެއް ވެސް ނެރެފަ އެވެ.