ހައި ކޯޓްގެ އިސް ފަނޑިޔާރު ކަމަށް އައްޔަންކުރި ހުސައިން ޝަހީދާއި ސިވިލް ކޯޓްގެ އިސް ގާޒީއަކަށް އައްޔަންކުރި މަރްޔަމް ވަހީދަށް މަގާމުގެ ފަތްކޮޅު އަރުވައިފި އެވެ.
އައްޑު އަށް ނިސްބަތްވާ އެ ދެ ބޭފުޅުންނަށް ޖުޑިޝަލް ސާވިސް ކޮމިޝަން ޖޭއެސްސީ) އިން ފަތްކޮޅު އެރުވީ އިއްޔެ އެވެ. އެގޮތުން ލިޔުން ޙަވާލުކޮށް ދެއްވީ ޖޭއެސްސީގެ ރައީސާ ހިސާން ހުސެއިނެވެ.
ހިތަދު އަށް އުފަން ޝަހީދަކީ ކުއްލިއްޔަތުލް ދިރާސާތުލް އިސްލާމިއްޔާއިން މާސްޓަސް އޮފް ޖުޑީޝަލް ސައިންސް އެންޑް ޝަރީއާ ޕޮލިސީ އަދި ބެޗެލަރސް ޑިގްރީ އިން ޝަރިޢާ އެންޑް ލޯ ހައްދަވާފައިވާ ބޭފުޅެކެވެ. ނޮވެމްބަރު 26، 2014 ގައި ފަނޑިޔާރުކަމުގެ ހުވާކުރެއްވި ޝަހީދަކީ އައްޑޫ ފޭދޫ މެޖިސްޓްރޭޓް ކޯޓުގެ މެޖިސްޓްރޭޓްކަމާއި ނ. ހޮޅުދޫ މެޖިސްޓްރޭޓް ކޯޓުގެ މެޖިސްޓްރޭޓްކަމާއި، ކްރިމިނަލް ކޯޓުގެ ޤާޒީކަން ވެސް ކުރައްވާފައިވާ ބޭފުޅެކެވެ.
އަދި ހައި ކޯޓުގެ ފަނޑިޔާރުކަމަށް އޭނަ އައްޔަންކުރީ ޖުލައި 24، 2018 ގަ އެވެ.
ސިވިލް ކޯޓުގެ އިސް ގާޒީއަކަށް އައްޔަންކުރި ފުރަތަމަ އަންހެން ބޭފުޅާގެ ޝަރަފު ލިބިވަޑައިގަތް މަރްޔަމަކީ ވިލާ ކޮލެޖުން މާސްޓަސް އޮފް ޝަރީއާ އަދި މޯލްޑިވްސް ކޮލެޖް އޮފް ހަޔަ އެޑިއުކޭޝަނުން ބެޗެލަސް އޮފް ލޯސް ޙާޞިލްކުރައްވާފައިވާ ބޭފުޅެކެވެ. އައްޑޫ ފޭދު އަށް އުފަން މަރްޔަމް އޭޕްރީލް 13، 2016 ގައި ގައި ސިވިލް ކޯޓުގެ ގާޒީކަމަށް ޢައްޔަންކުރުމުގެ ކުރިން ހިތަދޫ މެޖިސްޓްރޭޓް ކޯޓާއި ކ. ގާފަރު މެޖިސްޓްރޭޓް ކޯޓްގެ މެޖިސްޓްރޭޓްކަން ވެސް ކުރައްވާފައިވެ އެވެ.