އިންތިހާބީ ރައީސް ޑރ. މުހައްމަދު މުއިއްޒު މިރޭ ސިންގަޕޫރަށް ފުރާވަޑައިގަންނަވާ ގޮތަށް ހަމަޖެހިއްޖެ އެވެ.
މިއީ މިދިޔަ މަހުގެ 30 ގައި ބޭއްވި ރިޔާސީ އިންތިހާބު ކާމިޔާބު ކުރެއްވި ފަހުން ގައުމުން ބޭރަށް، މުއިއްޒު ވަޑައިގަންނަވާ ފުރަތަމަ ފަހަރެވެ. އެ މަނިކުފާނު ހުވާކުރައްވަން ހަމަޖެހިފައި ވަނީ އަންނަ މަހުގެ 17 ގަ އެވެ.
މުއިއްޒު ސިންގަޕޫރަށް ފުރާވަޑައިގަތުމަށް ހަމަޖެހިފައި ވަނީ މިރޭ 11:40 އެހާކަށްހާ އިރުގަ އެވެ. މިއީ އާއިލާއާ އެކީ ކުރައްވާ ނުރަސްމީ ދަތުރެއް ކަމަށް އިންތިހާބީ ރައީސްގެ ތަރުޖަމާނު ވިދާޅުވެފައިވެ އެވެ.
އެނގިފައިވާ ގޮތުގައި ރައީސްކަމުގެ ހުވާކުރެއްވުމަށް ފަހު މުއިއްޒު އެންމެ ފުރަތަމަ ވަޑައިގަންނަވާނެ ގައުމަކީ ސައުދީ އަރަބިއްޔާ އަށެވެ.
މުއިއްޒު ހުވާކުރެއްވުމުގެ ތައްޔާރީތައް ކުރިއަށްދާ އިރު، ދާދި ފަހުން ބޭރުގެ ބައެއް މީޑިއާތަކަށް އިންޓަވިއުތައް ވެސް ދެއްވާފައިވެ އެވެ. އޭގެ ތެރޭގައި އަލް ޖަޒީރާ، ބްލޫމްބާގް ޓީވީ އަދި ރޮއިޓާސް ހިމެނެ އެވެ.