އިންތިހާބީ ރައީސް ޑރ. މުހައްމަދު މުޢިއްޒު ހުވާ ކުރުމުގެ ރަސްމީއްޔާތައް އާންމު ފަރާތްތަކަށް 1000 ޖާގަ ދިނުމަށް މަސައްކަތް ކުރަމުންދާ ކަމަށް އިންތިހާބީ ރައީސްގެ އޮފީހުން ހާމަކޮށްފިއެވެ.
އެއޮފީހުން މިއަދު ބޭއްވި ނޫސްވެރިންގެ ބައްދަލުވުުމުގައި ވަނީ އިންތިހާބީ ރައީސް ހުވާ ކުރެއްވުމުގެ ރަސްމީއްޔާތައް ޙަރަދުވާނެ ކަމަށް މަޖިލީހުން ފުރަތަމަ ލަފާ ކުރީ 29 މިލިއަން ރުފިޔާކަން ހާމަކުރައްވާފައެވެ. ނަމަވެސް އެ އަދަދު ބޮޑު ކަމަށް ޑރ. މުޢިއްޒުއަށް ފެނިވަޑައިގަތުމުން އިތުރަށް މަޝްވަރާ ކުރެވި މިހާރު 22.9 މިލިއަން ރުފިޔާ އެކަމަށް ބަޖެޓު ކުރެވިފައިވާ ކަމަށް ވިދާޅުވިއެވެ.
އެ އޮފީހުގެ ތަރުޖަމާނު ފިރުޒުލް އަބްދުﷲ ހަލީލް ވިދާޅުވީ، ހުވާ ކުރުމުގެ ރަސްމީއްޔާތަށް 3500 މީހުންނަށް ހާއްސަ ދައުވަތު ދޭނެ ކަމަށް ރައްޔިތުން މަޖިލީހުން ހާމަކޯށްފައި ވާނެ ކަމަށް ވިދާޅުވިއެވެ.
" ރައްޔިތުންގެ މަޖިލީހުން އިތުރަށް ފާޙަގަކޮށްފައިވޭ 3500 ހާއްސަ ދައުވަތު ދިނުމަށް ނިންމާފައިވާކަން. އޭގެ އިތުރަށް އަޅުގަނޑުމެން މަސައްކަތް ކުރަމުން މިދަނީ އިތުރުން 1000، އާންމުންނަށް އާންމުކޮށް ހުޅުވާލެވިގެން ބައިވެރިވެވޭނެ ފުރުސަތު ފަހިކޮށްދިނުމަށް " ފިރުޒުލް ވިދާޅުވިއެވެ.
އިންތިހާބީ ރައީސް އޮފީހުން ވަނީ މިހާރު ރަސްމީއްޔާތައް ތައްޔާރުވުމުގެ މަސައްކަތް ބާރަށް ކުރިއަށްދާ ކަމަށެވެ.
އެއޮފީހުގެ ތަރުޖަމާނު ވަނީ މިމަސައްކަތާއި ގުޅޭގޮތުން ޑރ. މުޢިއްޒުގެ ޓީމާއި ކުރެވުނު މަޝްވަރާތަކުން 2018 ވަނަ އަހަރު ރައީސް ސާލިޙް ހުވާ ކުރެއްވުމުގެ ރަސްމީއްޔާތައް ޚަރަދުވީ 17 މިލިއަން ރުފިޔާ ކަން އެނގިފައިވާ ކަމަށް ވިދާޅުވެފައެވެ.