ވިސާ މުއްދަތު ހަމަވުމުންވެސް ޗައިނާ ފަތުރުވެރިއަކު ރާއްޖެއިން ފުރަން ދެކޮޅު ހަދާފައިވާ ކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.
މިކަމާއި ގުޅޭގޮތުން އެ އިދާރާއިން ނެރުނު ނޫސްބަޔާނުގައި ބުނީ، މި ފަތުރުވެރިޔާ ރާއްޖެއިން ފުރުމަށް އޮތީ މިމަހުގެ 19 ވަނަ ދުވަހު ކަމަށެވެ. ނަމަވެސް ޗެކިން ވުމަށް ފަހު، އިމިގްރޭޝަން ކްލިއަރެންސްވެސް ނިމުމަށް ފަހު އޭނާ ފްލައިޓަށް އެރުމަށް ދެކޮޅު ހެދި ކަމަށް އިމިގްރޭޝަނުން ބުނެއެވެ. ޗައިނާއަށް ނިސްބަތްވާ މި އަންހެންމީހާ ފްލައިޓަށް އެރުމަށް ދެކޮޅު ހަދައި ފްލައިޓުން އޮފްލޯޑު ކުރުމުން، އެއާޕޯޓުގެ ވެއިޓިން އޭރިއާގެ ގޮނޑި ބަރީގައި ނިދައި ބޭނުން ކުރާ ފަރާތްތަކަށް އުނދަގޫ ވާގޮތަށް އޭނާ ޢަމަލުތައް ބަހައްޓާފައިވާ ކަމަށް އިމިގްރޭޝަނުން ބުނެއެވެ.
އެއަންހެންމީހާ އެކަމާއި ގުޅިގެން ޓުއަރިސްޓް ޕޮލިސްއިން ވަނީ މޯލްޑިވްސް އިމިގްރޭޝަނާއި ހަވާލުކޮށްފައެވެ. ނަމަވެސް އިމިގްރޭޝަން ޑިޓެންޝަން ސެންޓަރުގައި މިވަގުތު އަންހެނުން ބަހައްޓަން ވަކި ހާއްސަ ޖާގައެއް ނެތުމުން އޭނާއަށް ވީ އެންމެ އަވަހަށް ފުރުމަށް އެންގިފައިވާ ކަމަށް އިމިގްރޭޝަނުން ބުނެއެވެ. ނަމަވެސް އޭނާގެ ފަރާތުން މިކަމަށް އެއްބާރުލުން ލިބިފައި ނުވެއެވެ.
މިމައްސަލާގައި މިހާރު ޗައިނާ އެންބަސީ މެދުވެރިކޮށް އޭނާގެ އާއިލާއަށް ގުޅައި، އޭނާ ފުރުވާލުމުގެ މަސައްކަތް ކޮށްދިނުމަށް ފޮރިން މިނިސްޓްރީގައި އެދިފައިވާ ކަމަށް އިމިގްރޭޝަނުން ހާމަކުރެއެވެ. އަދި މިހާރު އެއިންތިޒާމު ހަމަޖެއްސުމަށް މަސައްކަތް ކުރަމުންދާ ކަމަށް ވިދާޅުވިއެވެ.
ފޮރިން މިނިސްޓްރީން އިންތިޒާމުތައް ހަމަޖެހެންދެން އޭނާގެ ޢަމަލުތައް ހުރި ގޮތުން މިހާރު ފުރުމާއި ހަމައަށް އިމިގްރޭޝަންގެ ޑިޓެންޝަން ސެންޓަރުގައި ބެހެއްޓުމަށް ނިންމާފައިވާ ކަމަށް އިމިގްރޭޝަނުން ހާމަކުރެއެވެ.
ޗައިނާއަކީ ރާއްޖެއަށް މިވަގުތު 3 ވަނައަށް އެންމެ ގިނަ ފަތުރުވެރިން އަންނަ ޤައުމެވެ. އެ މާކެޓުން ފަތުރުވެރިން ކޯވިޑަށް ފަހު އަންނަން ފެށީ މިއަހަރުގެ މާރިޗު މަހުއެވެ.