ވިޔަފާރި އުސޫލުން ގޭގައި ކާބޯތަކެތި ތައްޔާރުކުރާ ނަމަ އޭގެ ރައްކާތެރިކަމާ ގުޅޭ ކޯހެއް ހެދުމަށް ލާޒިމުކުރަން ފުޑް އެންޑް ޑުރަގު އޮތޯރިޓީ (އެފްޑީއޭ) އިން ނިންމައިފި އެވެ.
އެތަނުން ބުނީ މުއްދަތު ހަމަވާ ތާރީހު 24 ގަޑިއިރަށް ވުރެ އިތުރަށް ހުންނަ ކާބޯތަކެތި ތައްޔާރުކުރެވޭނީ ބޭސިކް ފުޑް ސޭފްޓީ ނުވަތަ އެ އެޖެންސީން ހިންގާ ކާބޯތަކެތީގެ ރައްކާތެރިކަމުގެ ތަމްރީނު ޕްރޮގްރާމް ނިންމާފައިވާ މީހުންނަށްނަށް ކަމަށެވެ. މިގޮތަށް ނިންމައި އެފްޑީއޭ އިން ވަނީ "އާމްދަނީ ހޯދުމަށް ގޭގައި ކާބޯތަކެތި ތައްޔާރުކުރުމުގައި އަމަލު ކުރަންވީ ގޮތުގެ މިންގަނޑު" ވެސް މިއަދު އާންމުކޮށްފައެވެ.
މީގައިވާ ވަނީ ކާބޯތަކެތި ތައްޔާރުކުރާ ބަދިގެ ހުންނަން ޖެހޭ ގޮތާއި ހިފާ ގެންގުޅޭ ސާމާނާއި އާލަތްތަކުގައި ފުރިހަމަވާން ޖެހޭ ޝަރުތުތަކާއި އަދި ކާބޯތަކެތި ތައްޔާރުކުރާ މީހުންގެ އާންމު ސާފުތާހިރުކަން ބަހައްޓަންވީ ފަދަ ގޮތްތައް ހިމަނާފައިވެ އެވެ. އަދި ބަންދުކުރި ކާބޯތަކެތި ލޭބަލްކުރުމުގެ ގައުމީ މިންގަނޑާ އެއްގޮތަށް ލޭބަލްކުރުމަކީ ންއްމު ޝަރުތުގެ ބައެއްގެ ގޮތުގައި ވެސް ވަނީ ހިމަނާފައިވެ އެވެ.
މިންގަނޑުގައި ވަނީ ކާބޯތަކެތި ތައްޔާރުކުރާ ތަނުގައި އަތް ދޮވުމާއި ހިފަ އިގެންގުޅޭ ސާމާނު ދޮވެ ސާފުކެވޭނެ އިންތިޒާމު ވެސް ހުންނަން ޖެހޭނެ ކަމަށް ކަނޑައަޅައި އާމްދަނީ ހޯދަން ކާބޯތަކެތި ތައްޔާރު ކުރުމަށް ވަކި ތެލި ތަށި ފަދަ ތަކެތި ހާއްސަކުރުން ވެސް ޖެހޭ ކަމަށް ކަނޑައަޅައިފަ އެވެ. އަދި ރޯނުފިލުވައި ހުންނަ ކާބޯތަކެއްޗާއި އެ ނޫން ކާބޯތަކެއްޗަށް ވަކި ހާއްސަ ތަށި ސަމުސާ ފަދަ ތަކެތި ބޭނުން ކުރަން ޖެހެ އެވެ. އެ އެއްޗިއްސަށް ވަކި ތަށި ސަމުސާ ނެތް ނަމަ ރޯނުފިލުވައި ހުންނަ ކާބޯތަކެއްޗަށް ބޭނުންކުރި ތަކެތި ބޭނުން ކުރަން ޖެހޭނީ ރަނގަޅަށް ދޮވެ ޑިސްއިންފެކްޓު ކުރުމަށް ފަހު ވެސް މިންގަނޑުގައި ހިމަނާފައިވެ އެވެ.
އާމްދަނީ ހޯދަން ގޭގައި ކާބޯތަކެތި ތައްޔާރުކޮށް ވިއްކުމަކީ ރާއްޖޭގައި އާންމު ކަމެކެވެ.