އިންތިހާބީ ރައީސް ޑރ. މުހައްމަދު މުއިއްޒު ނިސްބަތްވާ ޕާޓީ، ޕީއެންސީގެ މެންބަރުންގެ އަދަދު 10،000 އަށް އިތުރުކުރަން އަމާޒު ހިފައިފި އެވެެ.
ސެޕްޓެމްބަރު މަހުގެ 30 ގައި ބޭއްވި އިންތިހާބު ކާމިޔާބުމާ އެކީ މުއިއްޒު ވަނީ ޕާޓީގައި އިސްކޮށް އުޅުއްވާ ބޭފުޅުންގެ ކިބައިން ޕީއެންސީގެ މެންބަރުންގެ އަދަދު އެންމެ މަދުވެގެން 10،000 އަށް އިތުރުކޮށް ދެއްވުމަށް ވެސް އެދިވަޑައިގެންފަ އެވެ. އަދި މި މަސައްކަތް ކުރިއަށްދާ އިރު، މި ހަފުތާގެ ތެރޭގައި މަޖިލިސް މެންބަރަކު ވެސް ވަނީ އެ ޕާޓީ އަށް ސޮއިކުރައްވައިފަ އެވެ.
ޕީއެންސީގެ އޮފިޝަކަލު ވިދާޅުވީ ޕާޓީ އަށް މެންބަރުން އިތުރުކުރުމުގެ މަސައްކަތް، މީގެ ކުރިން ކުރިއަށް ނުދާ ސްޕީޑްގައި ދެން ކުރިއަށްދާނެ ކަމަށެވެ. އެގޮތުން ވީހާ ވެސް އަވަހަކަށް މެންބަރުންގެ އަދަދު 10،000 އަށް އިތުރުކުރަން ހިފާފައިވާ އަމާޒަށް ވާސިލުވެވޭނެކަމުގެ އުންމީދު ވެސް ބޮޑު ކަމަށް ވިދާޅުވި އެވެ.
ސިޔާސީ ޕާޓީތަކުގެ ގާނޫނުގައިވާ ގޮތުން ޕާޓީތަކަށް ދައުލަތުގެ ބަޖެޓުން ފައިސާ ލިބެނީ ވެސް 10،000 މެންބަރުން ހަމަވާ ނަމަ އެވެ. އެހެންވެ އެއީ ވެސް ޕީޕީއެންސީ އަށް މެންބަރުން އިތުރުކުރަން ބޭނުންވާ މުހިއްމު ސަބަބެކެވެ. އަދި މުއިއްޒާ އެކީ އެ ޕާޓީ އަކީ ވަރުގަދަ ޕާޓީއަކަށް ހެދުމުގެ ވިސްނުން ޕާޓީގެ ތެރޭގައި މިހާރު ވަރަށް ބޮޑެވެ.
ރާއްޖޭގައި މިހާރު 10،000 މެންބަރުން ހަމަވަނީ ހަތަރު ޕާޓީއެއްގަ އެވެ. އެއީ އެމްޑީޕީ އާއި ޕީޕީއެމާއި އަދާލަތު އަދި ޖުމްހޫރީ ޕާޓީގަ އެވެ.
ޕީއެންސީ ކެންޑިޑޭޓްގެ ގޮތުގައި މުއިއްޒު ރިޔާސީ އިންތިހާބު ކާމިޔާބުކުރުމާ ހަމައަށް އެ ޕާޓީ ފާހަގަކުރެވުނީ، ދެވަނަ އަށް އެންމެ ބޮޑު ޕާޓީ، ޕީޕީއެމްގެ ހިޔަނީގައި އޮތް ޕާޓީއެއްގެ ގޮތުގަ އެވެ. އެގޮތުން އެ ޕާޓީގެ ކޯލިޝަންގެ ބައިވެރިއެއްގެ ގޮތުގައި ޕީއެންސީ އޮތަސް ނަގާކިޔާ ޕާޓީ ކުރީގެ ރައީސް އަބްދުﷲ ޔާމީން ރައީސަކަށް ހުންނެވި ޕީޕީއެމެވެ.
ޕީޕީއެމަށް މެންބަރުން އިތުރުކުރާތީ މި ހަފުތާގައި ޔާމީން ވަނީ އެކަމަށް ފާޑު ވިދާޅުވެފަ އެވެ. އެގޮތުން ޕީއެންސީ އަށް މެންބަރުން އިތުރުކުރަން ޕީޕީއެމްގެ މެންބަރުން ފޯމު ފުރަން ނުޖެހޭނެ ކަމަށް ވިދާޅުވެފައިވެ އެވެ.
މުއިއްޒު ރައީސްކަމުގެ ހުވާކުރައްވަން ހަމަޖެހިފައި ވަނީ މި މަހުގެ 17 ގަ އެވެ.