އަންނަ އަހަރުގެ ބަޖެޓްގައި ކައުންސިލްތަކަށް ބްލޮކް ގްރާންޓްގެ ގޮތުގައި 2.1 ބިލިއަން ރުފިޔާ ހިމަނައިފި އެވެ.
މިއީ މިދިޔަ އަހަރާ ބަލާއިރު 300 މިލިއަން ރުފިޔާގެ އިތުރުވުމެކެވެ. މި އަހަރުގެ ބަޖެޓްގައި ކައުންސިލްތަކަށް ދޫކުރުމަށް ހިމެނީ 1.8 ބިލިއަން ރުފިޔާ އެވެ.
ފިނޭންސް މިނިސްޓްރީން ބުނީ ކައުންސިލްތަކަށް ބްލޮކް ގްރާންޓް ކަނޑައެޅުމުގައި ބަލާފައި ވަނީ 2021 ވަނަ އަހަރުގެ ބޯހިމެނުމުގެ ނަތީޖާއަށެވެ. މި ބަދަލަކީ 2014 ގެ އާބާދީއާ އަޅާބަލާއިރު، 2022 ވަނަ އަހަރުގެ އާބާދީގެ އަދަދަށް އައިސްފައިވާ ބަދަލުތަކުގެ މައްޗަށް ބަަލައި ގެންސްފައިވާ ބަދަލުތަކެއް ކަމަށް ވެސް މިނިސްޓްރީން ބުންޏެވެ. އެގޮތުން ބްލޮކް ގްރާންޓު އެއްވެސް ކައުންސިލަކަށް މަދުވެފައިވާ ނަމަ، އެއީ އެ ރަށެއްގެ އާބާދީ 2014 ގެ އަހަރުގެ ބޯހިމެނުމުގެ ނަތީޖާއިން ދައްކާ ޢަދަދަށް ވުރެ މިހާރު ދަށްވުމުގެ ސަބަބުން އަންނާނެ ބަދަލެއްކަން ވެސް ފިނޭންސުން ފާހަގަކޮށްފައިވެ އެވެ.
އަންނަ އަހަރަށް ލަފާކޮށް ހުށަހަޅާފައި ވަނީ 49.5 ބިލިޔަން ރުފިޔާގެ ބަޖެޓެކެވެ.
މި ބަޖެޓްގައި ކައުންސިލްތަކަށް ބްލޮކް ގްރާންޓްގެ ގޮތުގައި 2.1 ބިލިއަން ރުފިޔާ ހިމެނި އިރު، މި މަހުގެ 17 ގައި ހުވާކުރައްވަން ހަމަޖެހިފައިވާ އިންތިހާބޫ ރައީސް ޑރ. މުހައްމަދު ވިދާޅުވެފައި ވަނީ ކައުންސިލްތަކަށް ހާއްސަ މިނިސްޓްރީއެއް އުފައްދަވާނެ ކަމަށެވެ. ލާމަރުކަޒީ ނިޒާމަށް އަމަލުކުރަން ފެށި ފަހުން ކައުންސިލްގެ ބެލެނިވެރި ފަރާތަކީ ލޯކަލް ގަވަރަމަންޓް އޮތޯރިޓީ އެލްޖީއޭ) އެވެ.