ފަލަސްތީނުގެ ރައްޔިތުންނަށް އެހީވުމަށް ފަންޑް ރެއިޒިންގް ހަރަކާތެއް ހުކުރު ދުވަހު ބޭއްވުމަށް އާބަންކޯއިން ނިންމައިފިއެވެ.
ނޮވެމްބަރު 3 ވާ ހުކުރު ދުވަހު ބޭއްވުމަށް ހަމަޖެހިފައިވާ މި ހަރަކާތް ކުރިއަށް ދާނީ އެދުވަހު ހަވީރު 4:00 އިން 6:00 އަށް އަދި ރޭގަނޑު 8:00 އިން 10:00 އަށް ހުޅުމާލެ ސެންޓްރަލް ޕާކުގައެވެ. މި އިވެންޓުތެރެއިން ގިނަ ހަރަކާތްތަކެއް ކުރިއަށް ގެންދިއުމަށް ވަނީ ހަމަޖެހިފައެވެ.
މި އިވެންޓްގައި ފުޑް ސްޓޯލް، ޖަމްބަލް ސޭލް އަދި ކުޑަކުދިންނަށް ހާއްސަ ތަފާތު ހަރަކާތްތައް ކުރިއަށް ގެންދެވޭނެއެވެ. އެގޮތުން މި ހަރަކާތްތައް މެދުވެރިކޮށް ލިބޭ ހުރިހާ ފައިސާއެއް ފަލަސްތީނުގެ ރައްޔިތުންނަށް އެހީތެރިވުމަށް ދެވިގެންދާނެ ކަމަށް އާބަންކޯއިން ބުނެއެވެ.
އެކުންފުނީގެ އެދުމަކީ މި ހަރަކާތްތަކުގައި ވީހާވެސް ގިނަ ބަޔަކު ބައިވެރިވުމެވެ. އާބަންކޯއިން މީގެ ކުރިންވެސް ފަލަސްތީނަށް އެހީވުމަށް ބޭއްވި ގިނަ ހަރަކާތްތަކުގައި ބައިވެރިވެފައިވެއެވެ. އެގޮތުން އަމިއްލަ ޖަމީއްޔާ ޖަމާޢަތްތަކުގެ ހަރަކާތްތަކުގެ އެކުންފުނިން އެހީތެރިކަން ފޯރުކޮށްދީފައިވެއެވެ.