ރާއްޖެ އެތެރެކުރި ފްރާންސްގެ ޗީޒެއްގައި ޖަރާސީމުން ތައްގައްޔަރުވުމުގެ ފުރުސަތު އޮތުމުގެ ސަބަބުން، އެ ވައްތަރުގެ ޗީޒް ވިއްކުމާއި ބޭނުންކުރުން ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު މަނާކޮށްފި އެވެ.
އެމްއެފްޑީއޭ އިން މިއަދު ނެރުނު ބަޔާނެއްގައި ބުނީ 'އީކޮލައި' ޖަރާސީމުން ތަގައްޔަރުވުމުގެ ފުރުސަތު އޮތް ކަމަށް ބެލެވޭ އެ ޗީޒް ރާއްޖެ އެތެރެވެފައިވާ ކަމުގެ މައުލޫމާތު ޔޫރަފުގެ ރެޕިޑް އެލާޓު ސިސްޓަމް ފޯ ފުޑް އެންޑް ފީޑް (އާރްއޭއެސްއެފްއެފް) އާއި އިންޓަނޭޝަނަލް ފުޑް ސޭފްޓީ އޮތީރިޓީސް ނެޓްވޯކުން އެ އޮތޯރިޓީއަށް އަންގާފައިވާ ކަމަށެވެ.
އެ އެލާޓާ ގުޅިގެން، އެ ޗީޒްގެ ސަބަބުން ކާބޯތަކެތީގެ ރައްކާތެރިކަމަށް އޮތް ހިރާސްގެ މިންވަރު ބެލުމުގެ މަސައްކަތް ކުރަމުންދާ ކަމަށް އެމްއެފްޑީއޭ އިން ބުންޏެވެ.
"ވީމާ، ރައްކާތެރި ފިޔަވަޅެއްގެ ގޮތުން، ފަރަންސޭސިވިލާތުގެ މި މައުލޫމާތު ހިމެނޭ ޗީޒް ނުވިއްކުމަށާއި ބޭނުން ނުކުރުމަށް އަންގަމެވެ،" އެމްއެފްޑީއޭގެ ބަޔާނުގައިވެ އެވެ.