ދިވެހި ރެޑް ކްރެސެންޓުގެ ފަރާތުން ފަލަސްތީނުގެ ރެޑް ކްރެސެންޓަށް ސީދާ އެހީވުމަށް ހުޅުވާފައިވާ ފަންޑަށް 2.1 މިލިއަން ރުފިޔާ މިމަހުގެ 28 ވަނަ ދުވަހާއި ހަމައަށް ލިބިފައިވާ ކަމަށް އެ ޖަމާޢަތުން ހާމަކޮށްފިއެވެ.
ދިވެހި ރެޑް ކްރެސެންޓުގެ ފަލަސްތީން ރިލީފް ފަންޑު ހުޅުވާފައިވަނީ މިދިޔަ އޮކްޓޫބަރު މަހު 14 ވަނަ ދުވަހުއެވެ. އަދި ފަންޑް ރެއިޒިން ކުރިއަށް ގެންދިއުމަށް ހަމަޖެއްސީ މިދިޔަ މަހުގެ 28 ވަނަ ދުވަހާއި ހަމައަށް ދެ ހަފްތާއަށެވެ. މިމުއްދަތުގައި މި ފަންޑަށް 2،105،227.14ރ. ލިބިފައިވާ ކަމަށް ދިވެހި ރެޑް ކްރެސެންޓުން މިވަނީ ހާމަކޮށްފައެވެ. އަދި މިހާރު މި މުއްދަތުގައި ލިބުނު ފައިސާ ފަލަސްތީނު ރެޑް ކްރެސެންޓަށް ޖަމާޢު ކޮށްދިނުމުގެ މަސައްކަތް ފަށާފައިވާ ކަމަށް ދިވެހި ރެޑް ކްރެސެންޓުން ބުނެއެވެ.
ނަމަވެސް ހަނގުރާމައިގެ ހާލަތު ބަދަލުވަމުން ދިއުމާއި، އަދި ގިނަ ބައެއްގެ އެދުމުގެ މަތިން ފަނޑު މި ނޮވެމްބަރު މަހުގެ 12 އާއި ހަމައަށް ހުޅުވާފައިވާ ބެހެއްޓުމަށް އެ ޖަމާޢަތުން ވަނީ ނިންމާފައެވެ. އެހެން ކަމުން މިހާރުވެސް ފަނޑަށް އިތުރަށް އެހީވާން ބޭނުންވާ ފަރާތްތަކަށް އެ ފުރުސަތު ވަނީ ހުޅުވާލެވިފައެވެ.
Press Statement – Maldivian Red Crescent initiates transfer of funds collected from the MRC Palestine Relief Fund as of 28th October 2023.
Read More – https://t.co/Nf2SPFaia5 pic.twitter.com/byJ6aRxfoj
— Maldivian Red Crescent (@maldivianrc) November 1, 2023
ދިވެހި ރެޑް ކްރެސެންޓުގެ ފަރާތުން ފޮނުވާ އެހީ ތެރިކަމުގެ ފައިސާ ބޭނުން ކުރާނީ ފަލަސްތީން ރެޑް ކްރެސެންޓުން 10 އޮކްޓޯބަރގައި ހުޅުވާފައިވާ ޕްރިލިމިނަރީ އިމަޖެންސީ އިލްތިމާސަށް އިޖާބަ ދިނުމަށެވެ. އެގޮތުން ފުރަތަމަ އެހީގެ ޙިދުމަތް ފޯރުކޮށްދިނުމަށް ބޭނުންވާ ސާމާނު ހޯދުމަށާއި، އުޅަނދުތަކަށް ބޭނުންވާ ތެލަށާއި އަދި ހާލުގައި ޖެހިފައިވާ ފަރާތްތަކަށް ބޯހިޔާވަހިކަމާއި ކާބޯތަކެތި ފޯރުކޯށްދިނުމުގެ އިތުރުން އެހެނިހެން ޙަރަދުތަކަށް ފައިސާ ބޭނުން ކުރާނެއެވެ.
ދިވެހި ރެޑް ކްރެސެންޓުން ފަނޑަށް ލިބޭ ހުރިހާ ފައިސާއެއް ފޮނުވާނެއެވެ. އެގޮތުން ބޭންކް ޗާޖް ފިޔަވައި އިތުރު ޙަރަދެއް ފަންޑުގެ ތެރެއިން ނުދާނެ ކަމަށް ރެޑް ކްރެސެންޓުން ބުނެއެވެ.
ދިވެހި ރެޑް ކްރެސެންޓުގެ ފަންޑަށް ފައިސާގެ އެހީތެރިކަން ފޯރުކޮށްދޭން ބޭނުންވާ ފަރާތްތަކުން ފައިސާ ޖަމާކުރާނެ އެކައުންޓުތައް:
* ބޭންކް އޮފް މޯލްޑިވްސް (ބީއެމްއެލް) ރުފިޔާ އެކައުންޓް: 7701176022001
* (ބީއެމްއެލް) ޑޮލަރު އެކައުންޓް: 7701176022002
* މޯލްޑިވްސް އިސްލާމިކް ބޭންކް (އެމްއައިބީ) ރުފިޔާ އެކައުންޓް: 99010155500036100
* އެމްއައިބީ ޑޮލަރު އެކައުންޓް: 99010155500036200
އިޒްރޭލާއި ފަލަސްތީނާ ދެމެދު މިހާރު ހޫނުވެފައިވާ މައްސަލަގަނޑުގެ ތެރޭގައި ހާލުގައި ޖެހިފައިވާ ފަލަސްތީނުގެ ރައްޔިތުނަށް އެހީވުމަށް، ދިވެހި ޖަމިއްޔާއެއް ކަމަށް އިންޓަނޭޝަނަލް އެއިޑް ކެމްޕޭން (އައިއޭސީ) އިން ވެސް ވަަނީ ފަންޑެއް ހުޅުވައިފަ އެވެ.