ޕީޕީއެމް އަދި ޕީއެންސީގެ ފަރާތުން ރައްޔިތުންގެ މަޖިލީހުގައި ވާދަ ކުރައްވާ ކެނޑިޑޭޓުން ކަނޑައެޅުމަށް ބާއްވާ ޕްރައިމަރީ، އަންނަ އަހަރު ޖެނުއަރީ މަހު ބާއްވަން ޕްރޮގްރެސިވް ކޯލިޝަނުން ނިންމައިފިއެވެ.
ޕްރޮގްރެސިވް ކޯލިޝަނުން ޕްރައިމަރީ ބާއްވަން ނިންމާފައިވާއިރު، އެ ދެ ޕާޓީން މަޖިލީހަށް ވާދަ ކުރާނީ އެއް ބައެއްގެ ގޮތުގައި ކޯލިޝަނަކުގެ ތެރެއިން ކަމަށް ޕީޕީއެމްއިން ނެރެފައިވާ ނޫސްބަޔާނުގައިވެއެވެ. މި ޕްރައިމަރީ ބާއްވާނީ އަންނަ އަހަރު ޖަނުއަރީ މަހުގެ 20 ވަނަ ދުވަހުއެވެ.
އެގޮތުން މި އަހަރުގެ ޑިސެމްބަރު މަހު ފަހުކޮޅު ޕްރައިމަރީގައި ވާދަ ކުރުމުގެ ފުރުސަތު ހުޅުވާލާނެއެވެ. ޕްރައިމަރީގައި ވާދަ ކުރަން ބޭނުންވާ ފަރާތްތަކުން ފޯމު ހުށަހަޅާނީ ޑިސެމްބަރު 20 އިން 31 ގެ ނިޔަލަށް ކަމަށް ޕްރޮގްރެސިވް ކޯލިޝަނުން ހާމަކުރެއެވެ.
ދެ ޕާޓީން އެކުގައި ކެނޑިޑޭޓުން ނެރުމުގެ މަސައްކަތް ފަށާފައިވާއިރު، ޕީއެންސީން ދަނީ 10،000 މެންބަރުން ހަމަ ކުރުމަށް މަސައްކަތް ކުރަމުންނެވެ.