ޑިމޮކްރަސީގައި ކަންކަން އޮންނަ ގޮތާއި އަމަލުކުރަން ޖެހޭ ގޮތުގެ ވާހަކަ ރާއްޖޭގައި އެންމެ އަޑުހަރުކޮށް ދެއްކި އެކަކީ ކުރީގެ ރައީސް މުހައްމަދު ނަޝީދެވެ. އެހެންވެ ނަޝީދަކީ "ރާއްޖޭގެ ޑިމޮކްރަސީ ބައްޕަ" ކަމަށް ހަދައިގެން ވެސް ބަޔަކު އުޅުނެވެ. އެކަމަކު އެ ދުވަސް މިހާރު މާޒީވެއްޖެ އެވެ.
ސިޔާސީ ގޮތުން ނަޝީދު އަޅުއްވާ ކޮންމެ ފިޔަވަޅަކާ އެކީ ފެންނަނީ ޑިމޮކްރެސީއާ ބީރައްޓެހި ކަންކެމެވެ. ބޭނުންވެވަޑައި ނުގަންނަވާ ގޮތަކަށް ކަމެއް ހިނގާ ކޮންމެ ފަހަރެއްގައި ނަޝީދު ގެންދަވަނީ އެކަން ސާބިތުކޮށް ދެއްވަމުންނެވެ. މި ފަހުން ފެނުނު އޭގެ އެންމެ ބޮޑު ހެއްކަކީ އެމްޑީޕީގެ ރިޔާސީ ޕްރައިމަރީ އަށް ވާދަކުރައްވައި، ބަލިވެވަޑައިގަތުމުން ޑިމޮކްރަސީގެ ރޫހާ ހިލާފަށް ބަލި ގަބޫލުކުރައްވަން ދެކޮޅު ހައްދަވައި އަމިއްލަ ޕާޓީއާ ދެކޮޅަށް ނުކުންނެވުމެވެ.
އޭގެ އާހިރު ނަތީޖާއަކަށްވީ ނަޝީދު ވެސް އިސްކޮށް ހުންނަވައިގެން އުފެއްދި "އެމްޑީޕީ ފުނޑާލައި" އެހެން ޕާޓީީއެއް އުފެއްދުމެވެ.
ފެންނަަން އޮތް ހަގީގަތަކީ ނަޝީދަކީ ބަލީ ގަބޫލުކުރައްވަން ބޭނުންވެވަޑައިނުގަންނަވާ ބޭފުޅެއްކަމެވެ. އެކަމަކު ޑިމޮކްރަސީއާ ގުޅުވައި "ކާމިޔާބީގައި ހިތްތިރިކޮށް، ނާކާމިޔާބީގައި ހިތްވަރު ކުުރަން ޖެހޭ" ވާހަކަ ކުރިން އެންމެ ގަދައަށް ދެއްކެވީ ވެސް ނަޝީދެވެ. މައްސަލައަކަށްވެގެން އުޅެނީ މި ނަމޫނާ އަމިއްލަ އަށް ދައްކަވަން ނަޝީދު ނުކުޅެދުމެވެ. އެ ހިތްވަރެއް ނެތުމެވެ.
މަޖިލީހުގެ ރައީސްކަމުން އެ މަނިކުފާނު ވަކިކުރަން އެމްޑީޕީގެ 49 މެންބަރަކު ސޮއިކުރައްވައި ހުށަހަޅާފައި އޮތް މައްސަލާގައި ވެސް މި ފެންނަނީ، މެންބަރުން ވެސް ތަކުރާރުކޮށް ވިދާޅުވަމުން ގެންދަވާ ގޮތަށް "މަގާމުގައި ބަގުޑި ބައްދައިގެން، ގަދަކަމުން މަގާމުގައި ހުންނަވަން" މަސައްކަތް ކުރައްވާ ތަނެވެ.
އެހެން ނޫނީ ބަލި ހަމަ ޑިމޮކްރަސީގެ ރޫހާ އެއްގޮތަށް އިސްތިއުފާ ދެއްވަންވީ ނޫންތޯ އެވެ؟ މި މައްސަލާގައި ނަޝީދު "ވޯޓަށް ފިއްލަވައިގެން" އުޅުއްވާ އިރު، ރައްދު ދެއްވަމުން ވިދާޅު ވަނީ އެއް ފަހަރު އިތުރުބާރު އޮތިއްޔާ އަނެއް ފަހަރު އިތުބާރު ނެތް ކަމަށެވެ. އެހެންވެ މިކަން ނަޝީދު ސިފަކުރައްވަނީ އެމްޑީޕީން ކުޅޭ ކުޅިވަރެއްގެ ގޮތުގަ އެވެ.
ހަގީގަތަކީ ނަޝީދުގެ "ބޯހަރުކަމާ" ހުރެ މަޖިލިސް މިހާރު ހުއްޓިފައި އޮތްކަމެވެ. އިތުބާރުގެ މައްސަލަ އެޖެންޑާކުރި މި ހަފުތާގެ އެއްވެސް ޖަލްސާއެއް ބޭއްވިފައެއް ނުވެ އެވެ. ސަބަބަކީ އެ ޖަލްސާ ބޭއްވެން އޮތީ މަޖިލީހުގެ ނައިބު ރައީސް ރިޔާސަތުގައި އިންވައިގެން ކަމަށްވާތީ އެވެ.
ނަމަވެސް އެ މަގާމުގައި ހުންނެވީ ނަޝީދަށް ބޮޑުބޭބެ ވިދާޅުވާ އީވާ އަބްދުﷲ އެވެ. ބޮޑުބޭބޭފުޅުން ވޯޓުން ސަލާމަތްކުރައްވަން އީވ މިހާރު ކުަރައްވާ ކަމަކީ އާލާސްކަންފުޅާ އުޅުއްވާ ކަމަށް ވިދާޅުވެ "ސަލާން ބޯޑު" އެޅުއްވުމެވެ. މިކަމާ ހެދި ނަޝީދުގެ މައްސަލަ މިއޮތީ ކުރިއަށް ނުގެންފެވި އެވެ.
އެހެންވެ އެމްޑީޕީން މިހާރު އޮތީ މި މައްސަލަ ސުޕްރީމް ކޯތަށް ވެސް ހުށަހަޅައިފަ އެވެ. މައްސަލައިގެ ފުރަތަމަ އަޑުއެހުން އަންނަ ހޯމަ ދުވަހު އޮތީ ތާވަލުކޮށްފަ އެވެ.
މި ދަނޑިވަޅުގައި ނަޝީދުގެ މައްސަލަ ކޮޅެއްގައި ޖެހެން ޖެހެ އެވެ. ސަބަބަކީ މިއީ ސަރުކާރު ބަދަލުވުމުގެ މަރުހަލާ ކަމަށްވާތީ އެވެ. އިންތިހާބީ ރައީސް ޑރ. މުހައްމަދު މުއިއްޒު މި މަހުގެ 17 ގައި ހުވާކުރައްވަން އޮތީ ހަމަޖެހިފަ އެވެ. އެހެންވެ ނަޝީދު ރިޔާސަތު ބަލައްޓަވާ ޖަލްސާއެއްގައި އެކަން ކުރެވިގެން ނުވާނެ އެމްޑީޕީން އަންނަނީ ބުނަމުންނެވެ. އަދި ނަޝީދު ރިޔާސަތުގައި އިންނަވައިގެން މުއިއްޒު ހުވާކުރައްވައިފި ނަމަ އެ ހުވާ ބަލައިނުގަންނާނެ ކަމަށް އެމްޑީޕީން ބުނެ އެވެ.
މި މައްސަލަ ގާނޫނީ ބޮޑު މައްސަލަގަނޑަކަށްވެގެން ސިޔާސީ މަސްރަހު ހަލަބޮލިވާކަށް ގިނަ ބަޔަކު ނޭދޭނެ އެވެ. އެހެންވެ އަވަސް ހައްލެއް ބޭނުންވެ އެވެ ނަޝީދުގެ މައްސަލަ އަކީ މި ވަގުތު ގައުމީ މައްސަލައެކެވެ. މިކަމަށް އަވަސް ފަރުވާއެއް ބޭނުންވެ އެވެ. ނޫން ގައުމު ސިޔާސީ ބޮޑު "ކޯޅުންގަނޑެއް" ގެ ތެރެއަށް ވެއްޓިދާނެ އެވެ.